ხელნაკეთი კოსმეტიკის ბრენდი ''საპონერია'' - წარმატებულ ბიზნესად ქცეული სამედიცინო ცოდნა
By ანანო ჩხაიძე
You're reading Entrepreneur Georgia, an international franchise of Entrepreneur Media.
სულ ახლახან, ქართულ სატელევიზიო სივრცეში, საქართველოს პირველ არხზე, მსოფლიოში ერთ-ერთი ყველაზე პოპულარული შოუ "შარქ თენქ საქართველო" გამოჩნდა. ამ შოუს არსებობის მრავალწლიანი ისტორიის განმავლობაში, უკვე 250 მილიონი დოლარის ინვესტიცია განხორციელდა მსოფლიოს 40-ზე მეტ ქვეყანაში. "შარქები" ისმენენ, სვამენ მათთვის საინტერესო შეკითხვებს და პროექტის მოწონების შემთხვევაში, კომპანიის გარკვეული წილის სანაცვლოდ, კონკრეტულ თანხას სთავაზობენ კონკურსანტებს. ამ პროექტმა უკვე მთელი მსოფლიოს მასშტაბით უამრავი ადამიანი საკუთარი ბიზნესის მფლობელად და მეწარმედ აქცია. დამწყებ თუ უკვე აქტიურ სტარტაპერებს ფულადი და ინტელექტუალური ინვესტიციის მოზიდვის შესაძლებლობაც გაუჩნდათ "შარქებისგან", ხოლო 2021 წლიდან, ამის შესაძლებლობა უკვე ქართველ ანტრეპრენერებსაც მიეცათ.
აღსანიშნავია, რომ "შარქ თენქ საქართველოს" გენერალური სპონსორია ციფრული გადახდების მსოფლიო ლიდერი Visa − ქსელი, რომელიც აერთიანებს ყველას და ყველაფერს, რომელიც პროექტში გამარჯვებულებს თავიანთი ბიზნესის ეფექტურად მართვისა და გამარტივების მიზნით, სთავაზობს Visa-ს ინოვაციური პროდუქტების გამოყენების შესაძლებლობას. Visa-ს სტრატეგიის პრიორიტეტებს შორის ბიზნესისა და ეკონომიკის ხელშეწყობა უმნიშვნელოვანეს ადგილს იკავებს − როგორც ლოკალურ, ისე გლობალურ დონეზე. მცირე და საშუალო ბიზნესი, ეკონომიკის მამოძრავებელ ძალას და მსოფლიო მასშტაბით დამსაქმებელთა უდიდეს ნაწილს წარმოადგენს. Visa-ს როლი ბიზნეს-ეკოსისტემის განვითარებაში განსაკუთრებულია, რაც გამოიხატება ბიზნესის საჭიროებებზე მორგებული არაერთი ინოვაციური პროდუქტის შეთავაზებასა და მათთვის პარტნიორობის ფორმატში განხორციელებული ინიციატივებით. სწორედ ასეთ პროექტებს მიეკუთვნება "შარქ თენქ საქართველო" − პირველი არხის გადაცემა, რომელიც ბიზნესმენებსა და ინვესტორებს შორის ღია კომუნიკაციას უზრუნველყოფს. პროექტის მიზანია, ადგილობრივი ბიზნესების ცნობადობის გაზრდა და მათი პროდუქტის პოპულარიზაცია.
"შარქების" − სოსო ფხაკაძისა და მენი ბენიშის ბიზნესპორტფელს კიდევ ერთი ახალი ბიზნესი − "საპონერია" შეემატა, რომლის დამფუძნებელი და შემქმნელი ანა კაჭკაჭიშვილია. მისმა გამოცდილებამ და ინვესტორთან საუბრის მანერამ "შარქები" საკმაოდ დააინტერესა და ანამ ბიზნესის 50%-ის სანაცვლოდ 80 000 ლარის ინვესტიცია მოიზიდა. "შარქ თენქ საქართველოს" ამ ეპიზოდში უპრეცედენტო შემთხვევაც მოხდა − "შარქები" ანას ბიზნესით იმდენად მოიხიბლნენ, რომ მენი ბენიშმა 10%-იანი წილი შეიძინა სოსო ფხაკაძისგან და დამატებით, მოთხოვნილ 40 000 ლარზე ორჯერ მეტი ჩადო "საპონერიას" ბიზნესში.
"საპონერია" ერთ-ერთი პირველი, უნიკალური, ხელნაკეთი კოსმეტიკის ბრენდია, რომელიც უკვე ოთხი წელია ბუნებრივი შემადგენლობისა და ეკომეგობრულ საპნებს, მყარ შამპუნებს, სხეულის კარაქებსა და სარელაქსაციო პროდუქტებს აწარმოებს. ანა ერთ-ერთი პირველი იყო ამ საქმეში და სწორედ ეს გახდა იმის მიზეზი, რომ 2017 წლიდან ანაც და "საპონერიაც" ერთად იზრდებიან და ვითარდებიან. "ჩემი გამოცდილებით, "შარქ თენქ საქართველო" არაჩვეულებრივი პროექტია იმისთვის, რომ დამწყებმა თუ მოქმედმა ანტრეპრენერებმა, თავიანთი იდეა ინვესტორებს გააცნონ, დაფინანსების გარდა, სასარგებლო პარტნიორები შეიძინონ და ამავე დროს, ფართო საზოგადოებას გააცნონ თავიანთი საქმიანობა. რაც მთავარია, ეს შოუ ავითარებს სტარტაპ-კულტურას და ბიზნესის კუთხით აზროვნებას საქართველოს მოსახლეობაში", − ამბობს ანა კაჭკაჭიშვილი Entrepreneur-თან საუბრისას.
ანამ სამედიცინო ცოდნის გამოყენება ბიზნესში გადაწყვიტა. მან სხვადასხვა გზას მიმართა შესანიშნავი სურნელის აღმოსაჩენად. ბევრი შრომისა და მცდელობის შემდეგ კი პროექტში "შარქ თენქ საქართველო" აღმოჩნდა. პროექტის შესახებ შემთხვევით გაიგო და პარკში, ხის ქვეშ მოკლე ვიდეო ჩაწერა თავისი ბიზნესის შესახებ. "მომზადების პროცესში მაქსიმალურად შევეცადე დამეხვეწა და გამეძლიერებინა ჩემი პროექტი. ვიყიდე საჭირო კურსები, საფუძვლიანად შევისწავლე "ფიჩის" მომზადება, პრეზენტაციისა და ინფორმაციის დიზაინი, რათა რთული რიცხობრივი მასალა მარტივად გადმომეცა "შარქებისთვის". ამ ყველაფერში მათ ჩემი თავდაუზოგავი შრომა და განვითარების სურვილი დაინახეს. ვფიქრობ, სწორედ ეს გახდა ინტერესისა და წარმატების მიზეზი".
ანა 7 წელია ხელნაკეთი კოსმეტიკის საშუალებებით დაინტერესდა. მისი მონდომება ამ სფეროს შესწავლის მიმართ იმდენად დიდი იყო, რომ დღეს უკვე საკუთარი ბრენდი აქვს. ის ყველაფერს მარტო, საკუთარი ხელით აკეთებს და სწორედ ამისთვის სჭირდებოდა დაფინანსება, რათა უფრო გაეზარდა ბიზნესი და შეეძინა საჭირო ტექნიკა. "ამჟამად "საპონერია" რებრენდინგის პროცესშია და შეჩერებული გვაქვს გაყიდვები, რათა მომხმარებლის წინაშე გაუმჯობესებული, სრულყოფილი ასორტიმენტით წარვდგეთ. ვაკეთებთ საერთაშორისო სტანდარტის ლაბორატორია-საწარმოს, რომელიც "საპონერიას" მაღაზიასთან იქნება ინტეგრირებული და მომხმარებელს შეეძლება, თავისი თვალით ნახოს, როგორ და სად იქმნება მისი შენაძენი. ვფიქრობ, ეს მათთვის საინტერესო და მომხიბვლელი იქნება. პარალელურად, საქართველოს სავაჭრო-სამრეწველო პალატის მხარდაჭერით, ვამზადებთ ონლაინმაღაზიას, სადაც მომხმარებელი შეძლებს თავისუფლად და უსაფრთხოდ შეიძინოს საყვარელი პროდუქტები და საჩუქრები".
ფინანსური მხარდაჭერის გარდა, "შარქები" ანას თავიანთ ბიზნესხედვასა და გამოცდილებას უზიარებენ. ასევე, მისთვის უკვე ხელმისაწვდომია სხვადასხვა სფეროში დახელოვნებული, მრავალფეროვანი გუნდი, რომლის წევრებიც ანასთან ერთად, ზრუნავენ ბრენდის განვითარებაზე. მათი გამოცდილება და კონტაქტები სტრატეგიულ ობიექტებთან, დაეხმარება ანას სწორად განსაზღვროს და განახორციელოს გაყიდვების სტრატეგია.
ანას მოთხოვნილი თანხა სწორად კონვერტირდა მისი მიზნებისთვის. მან თავდაპირველად 20%-ის სანაცვლოდ 40 000 ლარი მოითხოვა. სოსო ფხაკაძე, მიუხედავად იმისა, რომ ანას ამ სფეროში საქმიანობის გამოცდილება არ აქვს, მოიხიბლა მისი პრეზენტაბელურობითა და ცოდნით, და გადაწყვიტა საკუთარი კონტაქტებითა და ზოგადად, ბიზნესის ცოდნით ამ სფეროშიც ჩართულიყო 50%-იანი წილის სანაცვლოდ. ანასთვის ეს გადაწყვეტილება რთული მისაღები არ იყო, რადგან იმ მიზანს მიაღწია, რისთვისაც პროექტში მივიდა. მოვლენები უჩვეულოდ განვითარდა: დადებითი პასუხით დაბრუნებულ ანას უკან უხმეს და უფრო სასიხარულო ამბავიც ახარეს − ბიზნესში მენი ბენიშიც ჩაერთო და გაორმაგებული თანხაც მიიღო. "სამომავლოდ, ბრენდის ცნობადობის გაზრდასთან ერთად, ვგეგმავთ მოლებსა და სააფთიაქო ქსელებში შესვლას. აუცილებლად მივიღებთ მონაწილეობას სილამაზის გამოფენებში, ვიმუშავებთ ხარისხის სხვადასხვა სერტიფიკატის მიღებაზე, რადგან სილამაზის და კოსმეტიკის სფეროში ეს ძალიან მნიშვნელოვანია. საქართველოს ბაზრის საკმარისად ათვისების შემდეგ, "საპონერია" საზღვრებს გარეთაც გავა და ჩვენს ქვეყანას ახალი კუთხით გააცნობს მსოფლიოს"
