Anthe - კომპანია, რომელიც სანთებელებს პერსონალური დიზაინებით ამზადებს
By თეკლა ადამია
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
სასურველი დიზაინის სანთებელების დამზადებით "ანთე" მომხმარებლებს საშუალებას აძლევს, თავიანთი პიროვნება, ინტერესები თუ სტილი ყოველდღიურად გამოსაყენებელი ნივთით გამოხატონ.
როგორც კომპანიის დამფუძნებელი, გიორგი ნოზაძე, Entrepreneur-თან საუბრისას აღნიშნავს, ყოველდღიურად ერთნაირი ბანალური დიზაინის მქონე სანთებელა მოსაბეზრებელი აღმოჩნდა, ამიტომ გადაწყვიტა შეექმნა პროდუქტი, რომლებიც ისევე განსაკუთრებული და გამორჩეული იქნებოდა სხვებისგან, როგორც ჩვენ, ადამიანები ვართ ერთმანეთისგან გამორჩეულები.
"პერსონალიზაციას შეუძლია სანთებელა უფრო მეტი გახადოს, ვიდრე, უბრალოდ, ფუნქციური ინსტრუმენტი. ის ხდება პირადი აქსესუარი ან განცხადება. ადამიანებმა შეიძლება აირჩიონ სანთებელა დიზაინით, რომელიც შეესაბამება მათ ჰობის, საყვარელ სიმბოლოებს ან მხატვრულ პრეფერენციებს. დიზაინის უნიკალურობამ ასევე შესაძლოა ინდივიდებს მათი სანთებელების იდენტიფიცირება და თვალყურის დევნება გაუადვილოს", - აღნიშნავს გიორგი ნოზაძე, "ანთეს" აღმასრულებელი დირექტორი.
"ანთე" გიორგიმ აბიტურიენტობის პარალელურად დააფუძნა, რაც მისგან დიდ გამბედაობას მოითხოვდა - სკოლის მოსწავლემ საკუთარი დანაზოგით, რაც მისთვის ერთ-ერთი ღირებული რამ იყო, სწავლის პარალელურად ბიზნესი წამოიწყო. გარისკა და რისკმაც გაამართლა.
გიორგის თქმით, "ანთესთვის" ერთ-ერთი გამოწვევა მიწოდების ჯაჭვის ეფექტიანი მართვა იყო. გარდა ამისა, საწყის ეტაპზე ხარისხის, ღირებულებისა და წარმოების ვადების დაბალანსებაც ერთ-ერთი მნიშვნელოვანი გამოწვევა აღმოჩნდა, განსაკუთრებით მაშინ, თუ დიზაინი კომპლექსურ პროცესებს მოითხოვდა. თუმცა ნელ-ნელა ეს დაბრკოლებები ბრენდმა წარმატებით გადალახა.
"შთაგონებას მაძლევს არა მხოლოდ ვიზუალურად ლამაზი დიზაინების შექმნა, არამედ დადებითი გამოხმაურება და იმის ცოდნა, რომ ჩვენმა პროდუქტმა მომხმარებლებს სიხარული, კმაყოფილება და სხვა უამრავი დადებითი ემოცია მოჰგვარა", - აღნიშნავს გიორგი.
რაც შეეხება ბრენდის განვითარების სამომავლო ხედვას, გიორგის მიზანია, "ანთემ" ქართულ ბაზარზე N1 ადგილი დაიკავოს და მაქსიმალურად მეტი მომხმარებლის გული გაათბოს. ამისათვის იგეგმება წარმოების გაზრდა და სხვადასხვა საინტერესო იდეის შეთავაზება მომხმარებლებისთვის, მათ შორის ეკომეგობრული პროდუქტებით.
