Burger Lions - ქართული ბაზრის ლიდერი ბურგერის ხელოვნებაში

Burger Lions-ის ისტორია 2019 წელს დაიწყო, როდესაც ნიკა სამადაშვილმა სარესტორნე ინდუსტრიაში ქართული პროდუქტის შექმნის იდეა გააცოცხლა. ბიზნესს საფუძველი 24 კვადრატული მეტრის პატარა სივრცეში ჩაეყარა. Burger Lions-ს ამბიციური მიზნები და განსაკუთრებული მისია ჰქონდა - ქალაქისთვის საუკეთესო ბურგერი უნდა შეეთავაზებინა.

თავდაპირველი სივრციდან კომპანიამ მნიშვნელოვანი ნაბიჯები გადადგა და 2020 წლის ოქტომბერში გახსნა პირველი სრულფასოვანი ფილიალი, რამაც გზას გაუხსნა Burger Lions-ს ფართო აუდიტორიისთვის.

რესტორნის დამფუძნებლის, ნიკა სამადაშვილის, სიტყვებით, "Burger Lions სიყვარულითა და ენთუზიაზმით შექმნილი ბრენდია". ნიკას მთავარი მოტივაცია იყო იმ ტიპის ბურგერის შექმნა, რომელიც ყველას შეუყვარდებოდა და მომხმარებელს დადებით ემოციებს აჩუქებდა.

Burger Lions-ის პროდუქტი უკვე წარმატებითაა მიღებული, რაც მისთვის დამატებით სტიმულად იქცა - თითოეული მომხმარებლის კმაყოფილი სახე ნიკას მუდმივ მოტივაციას აძლევს, გააკეთოს კიდევ უფრო მეტი.

რესტორნის მთავარი მისია კი, დაარსებიდან დღემდე, იყო და რჩება გულითადი მომსახურება და ხარისხის მაღალი დონე. დროის განმავლობაში კომპანიის ხედვა გაფართოვდა - ნიკა მიზნად ისახავს ბიზნესის მსოფლიო ბრენდად ჩამოყალიბებასა და ამისთვის ყველა ნაბიჯს იმედიანი თვალით უყურებს. გუნდი მუდმივად ამტკიცებს, რომ მათ აქვთ რესურსი, პროფესიონალიზმი და ხედვა, რაც საშუალებას მისცემს ბრენდს, საზღვრებს გარეთაც გახდეს წარმატებული.

როგორ დაიწყო ბაზარზე ლიდერი ბურგერბარის წარმატების ისტორია, რა აძლევს Burger Lions-ის გუნდს მოტივაციას, მუდმივად წინ იყურებოდნენ და აგრძელებდნენ სვლას მიზნებისკენ და როგორია ნიკა სამადაშვილის მიდგომები თუ მიზნები ბიზნესში - ამის შესახებ მას Entrepreneur-ი ესაუბრა.

როდის და ვინ დააფუძნა Burger Lions-ი?

Burger Lions-ის დაფუძნების იდეა 2019 წელს გაჩნდა. ამავე წელს დავიწყეთ მცირე ნაბიჯების გადადგმა, 24 კვადრატულში მოვაწყვეთ სივრცე, სადაც რამდენიმე თვე დავყავით. შემდეგ კი, გონივრული ნაბიჯების გადადგმით, 2020 წლის ოქტომბერში გავხსენით პირველი სრულფასოვანი ფილიალი.

რამ გიბიძგათ ამ ინდუსტრიაში შესვლისკენ და რა იყო თქვენი მთავარი მოტივაცია?

ეს საქმე დიდი სიყვარულით და ენთუზიაზმით დავიწყე, მინდოდა ქალაქში საუკეთესო ბურგერი შემექმნა, ისეთი, რომელიც ყველას შეუყვარდებოდა. მართლაც, ჩვენმა პროდუქტმა მალევე დაიმსახურა პატივისცემა და სიყვარული, ამან კი დამატებითი მოტივაცია გამიღვივა - მინდოდა, რომ ყველას შევყვარებოდით და კმაყოფილი და ბედნიერი მომხმარებლის სახეები გამრავლებულიყო. არაფერია იმაზე სასიამოვნო, როდესაც ხედავ, როგორ უყვართ და აბედნიერებთ შენი შექმნილი პროდუქცია. ეს მაძლევს კიდევ უფრო მეტის გაკეთების ბიძგს და სურვილს.

რა იყო სარესტორნე ქსელის ძირითადი მისია, ხედვა დაარსებისას და თუ შეიცვალა ის დროთა განმავლობაში?

ჩვენი მისია დაარსებიდან დღემდე ადამიანების გულების დაპყრობაა, შევცვალეთ მხოლოდ მასშტაბები. როცა რაღაც კარგად გამოგდის, არ უნდა გაჩერდე. მიმაჩნია, რომ არცერთ საქმეს არ აქვს დასასრული, შეგიძლია უსასრულოდ ავითარო ის. ჩვენი ამჟამინდელი უსასრულობა კი ასე გამოიყურება: Burger Lions-ი ვაქციოთ მსოფლიო ბრენდად, ვფიქრობთ, ეს შეგვიძლია, ამის გაკეთება მხოლოდ დროის საკითხია. დანამდვილებით შემიძლია გითხრათ, რომ Burger Lions-ი გახდება მსოფლიო ბრენდი, ის ზუსტად ახლა წერს თავის ისტორიას, რომელიც ასევე, მრავალჯერ დაიწერება და ამას მიეძღვნება დოკუმენტური ფილმები.

როგორ განვითარდა Burger Lions-ი დაარსების დღიდან? რა მნიშვნელოვანი ეტაპები გაიარეთ?

უამრავი ეტაპი გავიარეთ დაარსებიდან დღემდე. ჩვენ ვავითარებდით ხარისხს, ტექნოლოგიას, რამდენიმეჯერ მოხდა ახალი დანადგარებით გადაიარაღება, არ მახსენდება არცერთი დღე "ლომებში", როცა ახალ ლურსმანს არ ვაჭედებდით, ყოველი ახალი დღე წინას სჯობს, ჩვენი განვითარება ელვის სისწრაფით მიდის.

რა იყო კომპანიის თავდაპირველი გამოწვევები და როგორ დაძლიეთ ისინი?

როცა რაღაცას სიყვარულით აკეთებ, სიძნელეებსაც ნაკლებად გრძნობ, მასზე არ კონცენტრირდები. თუმცა გამოწვევები ყველა ბიზნესშია. მიმაჩნია, რომ წინააღმდეგობები თუ არ გხვდება, სუსტად ყალიბდები, სირთულეები რომც არ გქონდეს, უნდა ეძიო, რადგან მათი გადალახვაა სწორედ წარმატების საიდუმლო.

შემიძლია უამრავი რთული პერიოდი გავიხსენო, მაგრამ მირჩევია დადებითზე ვკონცენტრირდე. 2020 წელი ეს პანდემიის პერიოდია, სწორედ ჩვენი გახსნიდან 2 კვირაში გამოცხადდა "ლოქდაუნი" - ალბათ სწორედ ეს იყო ყველაზე რთული, თუმცა ამით გადარჩენა ვისწავლეთ და, შესაბამისად, ამან უფრო მეტი მოგვცა, ვიდრე წაგვართვა.

როგორ უმკლავდება Burger Lions-ის გუნდი გამოწვევებს?

Burger Lions-ს ძალიან გამოცდილი, საკუთარ საქმეზე შეყვარებული და ერთგული გუნდის წევრები ჰყავს. ვერ ნახავთ ჩვენთან ისეთ თანამშრომელს, რომელიც საქმეს მხოლოდ ანაზღაურებისთვის აკეთებდეს. მათი მხრიდან სიძნელეების გადალახვას ვერ დავარქმევდი, ეს უფრო საკუთარი საქმის პროფესიონალურად შესრულებაა.

ინდუსტრია, რომელშიც მუშაობთ, საკმაოდ მაღალი კონკურენტულობით გამოირჩევა - რა განასხვავებს თქვენს შეთავაზებულ სერვისებსა თუ პროდუქტებს ბაზარზე კონკურენტებისგან?

ამაზე შემიძლია უამრავი ვისაუბრო, მაგალითები მოგიყვანოთ, შევეცდები ძირითადი გიამბოთ. მოგეხსენებათ, ყველას თავისი პროდუქტი მიაჩნია საუკეთესოდ, ამიტომ ამ საკითხზე არ მინდა ჩემი შეფასება დავაფიქსირო, ეს ჩვენს საყვარელ მომხმარებლებს მივანდოთ, დანარჩენი კი ასე გამოიყურება: ჩვენ შევქმენით მსოფლიოში ყველაზე დიდი ზომის ბურგერები, ყველაზე ლამაზი გარემო, რომელიც არავის დიზაინს არ ჰგავს. მხოლოდ საკუთარი ხასიათი აქვს. ჩვენ გვაქვს ისეთი პროდუქცია ჩვენი მომხმარებლებისთვის მაგიდებზე განთავსებული, რომელიც შეუძლიათ მიირთვან ბურგერის მზადების მოლოდინში ან მისი მირთმევის შემდეგ - თანაც იმდენი, რამდენიც მოესურვებათ და ამაზე შეზღუდვა არ არის. გვაქვს ოჯახური გარემო, ჩვენი მომხმარებლები ოჯახებით, პატარა ბავშვებით გვსტუმრობენ, ეს მათი მხრიდან დიდი ნდობით არის გამოწვეული, რაც ძალიან გვახარებს. ამ ყველაფრის წყალობით Burger Lions-ი დღეს ყველაზე მოთხოვნადი, რეიტინგული კვების ობიექტია.

როგორ ცდილობთ ერთგული სტუმრების შენარჩუნებასა და ახალ აუდიტორიებზე გასვლას?

ამისთვის განსაკუთრებული ფორმულა არ გვაქვს. თუ გინდა, რომ იყო საუკეთესო, უნდა დაიჯერო, რომ საუკეთესო ხარ. მომხმარებლის შენარჩუნებას უამრავი რამ განაპირობებს: ხარისხი, გარემო, მომსახურება, სისუფთავე, სიახლეები, რეკლამა და, რაც მთავარია – "მთავარი სიყვარულია", რასაც მუდმივად გამოვხატავთ. მომხმარებელთან ურთიერთობაში ყოველთვის გულწრფელები ვართ, ეს ყველაფერი კი ერთიანობაში დიდი ძალა და იარაღია.

სწრაფი კვების ობიექტებში ჯანსაღი კვების შესაძლებლობა სტუმრებს იშვიათად, ან არ ეძლევათ - რა გამოარჩევს ამ კუთხით თქვენს რესტორნებს?

სიამაყით გეტყვით, რომ ყველაფერს ჩვენით ვაწარმოებთ; სოუსები, გარნირები, ბურგერის პურები – ჩვენი ხელით მზადდება. ვიყენებთ საუკეთესო პროდუქტებს, მხოლოდ ქართულ ნედლ ხორცს მოვიხმართ. ნებისმიერ დროს, ნებისმიერ მომხმარებელს შევიყვანთ ჩვენს საწარმოში პროცესის ახლოს გასაცნობად და ამას სიამოვნებით გავაკეთებთ.

რა მნიშვნელობა აქვს თქვენთვის მომხმარებლის უკუკავშირს და როგორ გეხმარებათ ეს განვითარებაში?

უკუკავშირის მიღების გარეშე არასდროს არავინ დაგვიტოვებია, ყოველთვის ვუსმენთ თითოეულ მათგანს, ამის გარეშე განვითარება წარმოუდგენელია, უკუკაშირის გარეშე ბიზნესი არ ამართლებს.

როგორია Burger Lions-ის გრძელვადიანი ხედვა მომავლისთვის?

დღეს Burger Lions-ი გადის მსოფლიო ბრენდად ჩამოყალიბების გზას, ეს პროცესი უკვე დაწყებულია. მჯერა, რომ სულ რამდენიმე წელიწადში ქართველები იამაყებენ, როცა ჩვენს ფილიალებს აღმოაჩენენ ამერიკაში, გერმანიაში, შვეიცარიაში, ესპანეთსა თუ ევროპის სხვა ქვეყნებში.

ჩვენ ეს შეგვიძლია! ჩვენ არასდროს არ გავჩერდებით. ჩვენ ვართ ახალი ხმა, ახალი სტილი, ახალი კულტურა. მსოფლიო კვების ინდუსტრიაში ჩვენ მოვედით როგორც პირველები და სამუდამოდ დავრჩებით ასევე პირველებად. ჩვენი გზა დაწყებულია - დროა მსოფლიომ მიიღოს ახალი ემოციები.

ჩვენ თქვენთან მოვდივართ!