როგორ შევარჩიოთ კლიმატური ტექნიკა

თუ ოდესმე გიგრძვნიათ, რომ ზაფხულში თქვენს სახლში შემაწუხებლად ცხელა ან ზამთარში ზედმეტად ცივა, დროა, კლიმატური ტექნიკის შეცვლაზე იფიქროთ. სახლში კომფორტული ტემპერატურის შესანარჩუნებლად და, ამასთან, ტენიანობის ოპტიმალური დონის მისაღწევად სწორად შერჩეულ გამაგრილებელ თუ გამათბობელ ტექნიკას უდიდესი მნიშვნელობა აქვს. თუმცა, ტექნიკის ბაზარზე არსებული ფართო არჩევანის გამო, შეიძლება, სწორი ტექნიკის ყიდვა ბევრს გაურთულდეს. დღევანდელ სტატიაში მოგიყვებით, რა ფაქტორები უნდა გაითვალისწინოთ გამათბობელისა და კონდიციონერის შერჩევისას.

სახლის ზომა და განლაგება

პირველი ფაქტორი, რაც ტექნიკის შერჩევისას უნდა გაითვალისწინოთ, თქვენი სახლის ზომა და მისი განლაგებაა. ძალიან პატარა გამათბობელი ან გამაგრილებელი ტემპერატურის შესანარჩუნებლად მუდმივ რეჟიმში დაიტვირთება, ხოლო ზედმეტად დიდი შეიძლება არაეფექტურად მუშაობდეს და ენერგიას ფლანგავდეს. ყურადღება მიაქციეთ სივრცის განლაგებასაც. ღია სივრცეში ჰაერი განსხვავებულად ცირკულირებს, ვიდრე დახურულში. თუ თქვენს სახლში დიდი ღია სივრცეა, დამატებითი მოწყობილობების დამონტაჟებაზე უნდა იფიქროთ, რომ ყველა ნაწილში კომფორტული ტემპერატურა შეინარჩუნოთ.

ჰაერის ხარისხი

იცოდით, რომ კლიმატური ტექნიკა ჰაერის ხარისხზე მნიშვნელოვნად მოქმედებს? ჰაერის ხარისხი კი პირდაპირ კავშირშია ჩვენს ჯანმრთელობასთან. გამართული ვენტილაციის მქონე სისტემა უზრუნველყოფს ჰაერის ცირკულაციას, ამავდროულად, გარედან დაბინძურებული ჰაერის შემოსვლას უშლის ხელს. მნიშვნელოვანი ფუნქციაა ჰაერის გაფილტრვაც, განსაკუთრებით ალერგიული ადამიანებისთვის. ის მოწყობილობები, რომლებიც ჰაერის გაწმენდის ფუნქციით არის აღჭურვილი, ფილტრავს მტვერს, ალერგენებს და სხვა ტიპის დაბინძურებებს ჰაერისგან.

პირადი პრეფერენციები

ტექნიკური მახასიათებლების გარდა, მნიშვნელოვანია, თქვენი პრეფერენციებიც გაითვალისწინოთ და გადაწყვიტოთ, სასურველ ტემპერატურასთან ერთად, რამდენად მნიშვნელოვანია მოწყობილობის კომფორტულობა. მაგალითად, ცენტრალური გათბობის შემთხვევაში, ზოგიერთი სისტემა საშუალებას გაძლევთ, ოთახებში ინდივიდუალური ტემპერატურა შეინარჩუნოთ. ასეთი სისტემები დანარჩენებთან შედარებით უფრო ძვირია. დაფიქრდით ხმაურზეც. თუ ხმაურის მიმართ ძალიან სენსიტიური ხართ, შეარჩიეთ ისეთი მოდელი, რომელიც ხმის დახშობის ფუნქციით არის აღჭურვილი. საბედნიეროდ, თანამედროვე მოდელების უმეტესობა ამის საშუალებას იძლევა.

ბრენდი

სანამ კონკრეტულ მოდელზე შეაჩერებდეთ არჩევანს, გაეცანით ბრენდს და დარწმუნდით, რომ ის სანდო და ეფექტურ მოდელებს აწარმოებს. ამ გზით მიიღებთ გარანტიას, რომ ტექნიკა დიდხანს და ერთგულად გემსახურებათ. შეგიძლიათ ონლაინ გაეცნოთ მომხმარებლის შეფასებებს ბრენდის შესახებ. გარდა ამისა, შეგიძლიათ მაღაზიის კონსულტანტსაც სთხოვოთ ბრენდის შესახებ ინფორმაცია მოგაწოდოთ. ამგვარად ტექნიკის ყიდვისას საკუთარ არჩევანში დარწმუნებული იქნებით.

ბიუჯეტი

დაბოლოს, სანამ ტექნიკას იყიდდეთ, გაწერეთ თქვენი ბიუჯეტი და მხოლოდ ამის შემდეგ დაიწყეთ მოდელების დათვალიერება. კლიმატური ტექნიკის ბაზარზე დღეს ბიუჯეტის კუთხითაც მრავალფეროვანი არჩევანია. ბიუჯეტურიდან დაწყებული, მაღალტექნოლოგიური მოდელების ჩათვლით, ნებისმიერი ბიუჯეტის მქონე შეძლებს შესაბამისი კონდიციონერისა თუ გამათბობლის შერჩევას. ასევე წინასწარვე გადაწყვიტეთ, რა არის თქვენთვის პრიორიტეტი - ენერგიის და, შესაბამისად, გადასახადების დაზოგვა გრძელვადიან პერსპექტივაში თუ საწყის, ყიდვის მომენტში ხარჯების შემცირება. შეიძლება გრძელ ვადაში უკეთესი გადაწყვეტილება იყოს შედარებით ძვირადღირებული, თუმცა ენერგოეფექტური მოდელის ყიდვა, ვიდრე იაფფასიანის, რომელიც სამომავლოდ ენერგიას გაფლანგავს.

დასკვნა

საბოლოოდ, კლიმატური ტექნიკის შერჩევა მოიცავს რამდენიმე მნიშვნელოვანი ფაქტორის გათვალისწინებას, რომლებზეც ზევით მოგიყევით. თუ თითოეულ მათგანზე კარგად დაფიქრდებით და გადაწყვეტილებას ჭკვიანურად მიიღებთ, დარწმუნებული იყავით, რომ თქვენი სახლი ზაფხულში სასიამოვნოდ გრილი, ხოლო ზამთარში თბილი და კომფორტული იქნება.