5 რჩევა ანტრეპრენერებს მაქსიმალური შედეგის მისაღებად
You're reading Entrepreneur Georgia, an international franchise of Entrepreneur Media.
ავტორი: ჯეიმს ბლეიკი
განურჩევლად იმისა, პატარა სტარტაპს მართავთ თუ უკვე მსხვილ კომპანიას, წარმატების მისაღწევად ნებისმიერი ანტრეპრენერისათვის აუცილებელია მაქსიმალურად გაზარდოს შრომის ნაყოფიერება და პროდუქტიულობა. წარმატების მთელი საიდუმლო კი იმაში იმალება, რომ საკუთარი ბიზნესის მართვისას ახალი შესაძლებლობები და დაბრკოლებები თანაბარი მზადყოფნით უნდა მივიღოთ.
თუ გსურთ საუკეთესო შედეგებს მიაღწიოთ და მთელი ყურადღება იმაზე გაამახვილოთ, რაც ყველაზე მნიშვნელოვანია თქვენი ბიზნესისთვის, გარკვეული ჩვევების გამომუშავებაზე უნდა იზრუნოთ და თქვენ ხელთ არსებული რესურსები გამოიყენოთ. ამ საკითხის მეტი თვალსაჩინოებისთვის, გვსურს გაგიზიაროთ რამდენიმე რჩევა, რომელიც ყველა ანტრეპრენერისთვის საინტერესო და სასარგებლო იქნება:
- ბაზარზე რაც შეიძლება ადრე უნდა გამოჩნდეთ
წარუმატებლობა იმ ერთადერთ შემთხვევაში გექნებათ გარანტირებული, თუ დროულად არ გამოჩნდებით და თქვენს ბიზნესს საზოგადოებას არ გააცნობთ. რამდენიც უნდა მოემზადოთ, იფიქროთ და ორგანიზება გაუწიოთ მოვლენებს, ადრე თუ გვიან მაინც მოგიწევთ ამ ნაბიჯის გადადგმა, ვინაიდან ცურვას მხოლოდ წყალში ჩასვლით თუ ისწავლით.
თუ არ გამოჩნდებით, სხვა არაფერს ექნება მნიშვნელობა. არ დაივიწყოთ, რომ სულერთია რამდენად ჭკვიანი ბრძანდებით, რამდენად ენთუზიაზმით ხართ აღსავსე ან რამდენად ნიჭიერებით გამოირჩევით − სხვას არაფერს ექნება მნიშვნელობა, თუ თავიდანვე არ გამოიჩენთ თავს. ნუ ელით, რომ წარმატებული ბიზნესი თავად იმუშავებს ან ფული ციდან ჩამოცვივდება.
- ისეთი პირობები შექმენით, რომ ფულმა თქვენთვის იმუშაოს
რატომ ვერ ხდება ფინანსურად დამოუკიდებელი ზოგიერთი ყველაზე ჭკვიანი და ნიჭიერი ადამიანი? ეს "ფულის პანიკის" ბრალია, რომელიც მუდმივად ზუზუნებს მათ ქვეცნობიერში. თუ ფინანსური შედეგების შეცვლა გსურთ, თქვენი აზროვნებით უნდა დაიწყოთ − უნდა გამოავლინოთ რა გაკავებთ, რა გაბრკოლებთ, და განწყობა შეიცვალოთ − თქვენი აზრები სიმდიდრეზე ფიქრით უნდა ჩაანაცვლოთ.
ეს არასოდეს ყოფილა ადვილი, ასე რომ, კიდევ უფრო ნუ გაართულებთ. დღეს მსოფლიოში უზარმაზარი ფინანსური რესურსი და უამრავი საშუალებაა, რათა ცნობილი გახდეთ. ინვესტიციების განხორციელება შესანიშნავი გზაა იმისათვის, რომ თქვენმა ფულმა თქვენთვისვე იმუშაოს, მაგრამ ამას ვერ შეძლებთ, თუ ხელფასი არ გაძლევთ ფულის გადადების საშუალებას ინვესტირებისთვის. ფულის გამომუშავებისა და დაზოგვის ერთადერთი მიზანი ის არის, რომ მისი ინვესტირება შეძლოთ და აიძულოთ მას თქვენთვის იმუშაოს.
- შრომის საშუალო ნაყოფიერებაზე ნუ დათანხმდებით
ჩვენი საზოგადოება ძირითადად შედგება ადამიანებისგან, რომლებიც ჩვეულებრივ ნაბიჯებს დგამენ. ისინი მთელი ცხოვრება ზუსტად იმდენს აკეთებენ, რომ საშუალო შედეგები, ჩვეულებრივი ცხოვრება და სამუშაო ჰქონდეთ, მაგრამ არასდროს აკეთებენ საკმარისს იმისათვის, რათა დიდ წარმატებას მიაღწიონ.
აქვე დავაზუსტებ, რომ საშუალო "განსაკუთრებულზე, არაჩვეულებრივზე ნაკლებს" ნიშნავს.
თუმცა, თქვენ ვერასოდეს მიაღწევთ შრომის მაქსიმალურ ნაყოფიერებას, როგორც ანტრეპრენერი, თუ რაღაცით გამორჩეული არ ხართ. წინ წამოსწიეთ თქვენი დიდი იდეები და შეეცადეთ რეალობად აქციოთ, თუნდაც ეს სახიფათო იყოს.
მაგალითად, მიმართეთ წესს "10-ჯერ მეტი", რომელიც გახლავთ ძალისხმევის გამრავლება და მიზნების დასახვა მოტივაციის ასამაღლებლად. გინდათ მილიონერი გახდეთ? 10-ზე გაამრავლეთ თქვენი მცდელობები. ცვლილებების შეტანა გსურთ თქვენს საზოგადოებაში? − თქვენ 10-ჯერ მეტი უნდა შეძლოთ.
- ნურასოდეს შეჩერდებით
ანტრეპრენერების უმრავლესობა რეცესიებისა და ვარდნის დროს უკან იხევს. ეს იმაზე მეტყველებს, რომ მათ ეშინიათ და სურთ ფრთხილად იყვნენ, ისინი ფულს ზოგავენ და ხარჯებს ამცირებენ. თქვენ ასე არ უნდა გააკეთოთ.
საქმე ის არის, რომ წარმატებული ანტრეპრენერებისთვის კრიზისი ქმნის ზრდის შანსს.
როდესაც თქვენი ყველა კონკურენტი უკან იხევს, თქვენ გზა ხსნილი გაქვთ წარმატების შემდეგ დონეზე გადასასვლელად. მაგალითად, ბევრმა ანტრეპრენერმა დაკარგა ფული 2008-2009 წლების ფინანსური კრიზისის დროს და შეშინდა. თუმცა, სხვებმა ეს უბედურება ტრიუმფად აქციეს, გადარჩნენ და საბოლოოდ, ადრინდელზე ბევრად წარმატებულები გახდნენ.
- საათობით იმუშავეთ
გახსოვდეთ, რომ არაფერი ფასეული არ მოდის მარტივად. თავდაუზოგავი შრომა ჩვევად აქციეთ და ყველაფერი გააკეთეთ, თუ წარმატების მიღწევა გსურთ.
თუ თქვენი პროდუქტის ან კონცეფციის პოპულარიზება გსურთ რომელიღაც ცნობილ ადამიანთან, ნურც დროს დაზოგავთ და ნურც ფულს. გახსოვდეთ, რომ საშუალო დონე გასაოცარზე ნაკლებია. ამიტომ, მეტის მისაღწევად იბრძოლეთ, მხოლოდ გადარჩენაზე ნუ იზრუნებთ. სამყარო სავსეა ნორმალური ადამიანებით, რომლებიც რაღაც განსაკუთრებულის გაკეთებას არ ცდილობენ და ჩვეულებრივითაც სრულიად კმაყოფილები არიან. ამ დროს, თანამედროვე სამყაროში საშუალოზე უკეთესი უნდა იყოთ. საშუალო უკვე აღარ არის მისაღები.
თუ გსურთ ნამდვილ წარმატებას მიაღწიოთ, უნდა გააცნობიეროთ, როგორ გამოიყენოთ თქვენი ჟინი მწვერვალზე ასასვლელად.
წინსვლამ შესაძლოა უკეთესი შედეგები მოგიტანოთ, მაგრამ ამასთან ერთად, შიშიც გაგიძლიეროთ. გაქცევის ნაცვლად, შეეგუეთ − შიში და წარმატება ხელიხელჩაკიდებულები დაიარებიან. გამოიყენეთ თქვენი შიში, რათა უფრო მაღლა და შორს წახვიდეთ.
განაგრძეთ ზრდა და მიღწევებზე იფიქრეთ. ნურასოდეს იქნებით მიღწეულით კმაყოფილი. თქვენი მოვალეობა წარმატების მიღწევაა, რაც შრომისმოყვარეობას, დისციპლინასა და თავდადებას მოითხოვს.
მზად ხართ ეს რჩევები გამოიყენოთ და როგორც ანტრეპრენერმა, მაქსიმალური შედეგები მიიღოთ?
