საუკეთესო ათეული გაიცანით 500 ფრანჩაიზის ლიდერები

1. Taco Bell

ფრანჩაიზინგის დაწყება −1964; სულ ობიექტები − 7900; გახსნის ღირებულება − $575.6K-$3.4M

ზედიზედ მესამე წელია, რაც ის პირველია ამ სიაში. რატომ ილტვიან ასე ძლიერ მისი კერძებისადმი? ბრენდი სარისკო ხელოვნებას დაეუფლა, ყოველთვის ძალიან კარგი უნდა იყოს, და ეს როგორც შინაურებზე, ისე უცხოებზე დიდი ყურადღების მიქცევით მოახერხა.

ნეიტ ჰოპერი

მექსიკური პიცის საქმე წასული იყო, ან Taco Bell ფიქრობდა ასე.

2020 წელი იდგა, როდესაც პანდემიამ მთლიანად შეცვალა კვების ბიზნესი. რესტორნების უმრავლესობის მსგავსად, შემცირებული პერსონალის გამო Taco Bell-იც დიდი მონდომებით ამარტივებდა მენიუს. აღმასრულებლებმა სწორედ მაშინ შეაჩერეს ყურადღება მექსიკურ პიცაზე, რომელიც დიდი ხანია მენიუში შედიოდა, და ცოტა არ იყოს უჩვეულო იყო. მისი რამდენიმე ინგრედიენტი არცერთ სხვა პროდუქტში არ გამოიყენებოდა. პიცის მომზადებას სამი ან ოთხი წუთი სჭირდებოდა, ამ დროს სხვებისას კი, სულ რაღაც 30 წამი. რესტორნებში ის ყოველდღიურად შედარებით ნაკლებად იყიდებოდა, ყოველ შემთხვევაში, ათასობით ტაკოსთან შედარებით. "ის საკულტო პროდუქტი იყო, მაგრამ შემოსავლის თვალსაზრისით, დიდი პროდუქტი ნამდვილად არა", − ამბობს Taco Bell-ის აღმასრულებელი დირექტორი მარკ კინგი. გადაწყვეტილება მტკივნეული, მაგრამ ნათელი იყო: მშვიდობით, მექსიკურო პიცავ.

მათ წარმოდგენაც არ ჰქონდათ, სწორი იყო თუ არა მიღებული გადაწყვეტილება.

"როგორც კი ის [მენიუდან] ამოვიღეთ, დიდი ამბავი ატყდა", − იხსენებს კინგი. მექსიკური პიცის გადარჩენის ერთმა პეტიციამ სწრაფად შეკრიბა 50 000 ხელმომწერი და საბოლოოდ − 170 000-ზე მეტი. 2021 წლის გაზაფხულზე, მაცდუნებლად მომხიბვლელმა რეპერმა დოჯა ქეტამ თავის მილიონობით გამომწერს Twitter-ზე დაუწერა: "ყველაფერს გავაკეთებ, Taco Bell-ის მექსიკური პიცის დასაბრუნებლად" (და თვეების შემდეგ, ოდნავ უფრო მახვილგონივრულადაც გაიმეორა: "ჩემი შეჩვენებული მექსიკური პიცის დაბრუნება მინდა @tacobell, რატომ არაფერს ამბობ"). ამასობაში, მარკ კინგი უამრავ წერილს იღებდა. ჩვეულებრივ, ეს იყო პრეტენზიები რესტორნებში ცუდი მომსახურების გამო, მაგრამ ახლა ორჯერ მეტ შეტყობინებას იღებდა, ყველა ერთს მოითხოვდა: დააბრუნეთ მექსიკური პიცა. "აღმოჩნდა, რომ ეს პროდუქტი კი არა", − ამბობს კინგი, − "მოძრაობა იყო, მექსიკური პიცის მოძრაობა".

ამიტომ, 2021 წელს გარკვეული გეგმები გამოჩნდა, რომ Taco Bell მექსიკურ პიცას დააბრუნებდა. კომპანიამ დოჯა ქეტასთან მოაწერა ხელი კონტრაქტს Super Bowl-ის სარეკლამო რგოლზე, და საზოგადოებას ახელებდა, მიანიშნებდა, რომ რომელიღაც საყვარელი პროდუქტი დაბრუნდებოდა. ბოლოსდაბოლოს, მექსიკური პიცა 2022 წლის მაისში დაბრუნდა.

მაგრამ Taco Bell-ი ვერც კი წარმოიდგენდა, რამდენად დიდებული იქნებოდა მექსიკური პიცის დაბრუნება, ისინი ვერ აცნობიერებდნენ, რამდენად საყვარელი, სასურველი და რამდენად კარგი გახდა მექსიკური პიცა მისი არყოფნის დროს. მათ ადრინდელზე შვიდჯერ მეტი მექსიკური პიცა გაყიდეს, გაყიდვების მთლიანმა ზრდამ ერთსა და იმავე მაღაზიებში 8%-ს მიაღწია. ამ დროს პიცის სპეციალური ტორტილები გაუთავდათ. კომპანია სხვა მომწოდებლებთან შეეცადა მოძებნას, მაგრამ მათი რეცეპტი არ იყო მთლად ისეთი, როგორიც უნდოდათ. ზოგიერთმა მაღაზიამ ერთ კვირაში გაყიდა ყველაფერი. Taco Bell-ს პრობლემა შეექმნა, თუმცა, ალბათ, საუკეთესო პრობლემა: Taco Bell უბრალოდ კარგი კი არა, ძალიან კარგი იყო.

Taco Bell-ს დიდი წარმატება ჰქონდა. 2022 წლის მესამე კვარტალში, ერთსა და იმავე მაღაზიაში გაყიდვები 6%-ით გაიზარდა, ხოლო სისტემური გაყიდვები − 9%-ით; გარდა ამისა, კომპანიამ 200-ზე მეტი რესტორანი გახსნა წლის განმავლობაში მთელ მსოფლიოში. "ჩვენ ვფიქრობდით, რომ კარგი წელიწადი გვექნებოდა, მაგრამ ამას ვერც კი წარმოვიდგენდით", − ამბობს კინგი. ახლა Taco Bell მესამე წელიწადია Entrepreneur-ის სიაში პირველ ადგილზეა, რაც იშვიათი მიღწევაა. 500 ფრანჩაიზის სიის არსებობის 40 წელიწადზე მეტი ხნის განმავლობაში, ეს მხოლოდ ორჯერ მოხდა − Subway-ისა და Hampton by Hilton-ის შემთხვევაში.

რაღაც ძალიან კარგი − უკვე აზროვნებაა...

შონ ტრესვანტი 2021 წლის დეკემბერში შეუერთდა Taco Bell-ს, მისი ახალი მთავარი ბრენდ-ოფიცრის სახით. მას წლები ჰქონდა გატარებული Nike-ის ფეხსაცმლის ქვესექტორ Jordan Brand-ის მარკეტინგში, რომელიც განსაკუთრებულ სტილზეა აგებული: პროდუქტები, რომლებიც კლასიკას და ულტრათანამედროვეს უხამებს ერთმანეთს და რომელსაც ტრადიციონალისტების სხვადასხვა ჯგუფიც მოიხმარს, და სხვებიც, მოდის მოაზროვნე მიმდევრებიც. როდესაც ის Taco Bell-ში მივიდა, იცოდა, რომ კომპანია თითქმის ყველაფერს ყიდდა. მაგრამ გრძნობდა, რომ ბრენდი ვიღაც კონკრეტულს უნდა დალაპარაკებოდა. როგორც ის ამბობს, მას "მუზა" სჭირდებოდა.

თაობა Z გახლდათ ასაკობრივი ჯგუფი, რომელზეც ყველაზე მეტად იყო გამართლებული ორიენტირება. მაგრამ თაობის შერჩევა ცოტას თუ გეტყოდათ იმის შესახებ, თუ როგორ უნდა მიგეყიდათ მათთვის პროდუქტი. ბოლოსდაბოლოს, თაობა Z-ს, ისევე, როგორც ნებისმიერ სხვა თაობას, უამრავი იდეა აქვს და ისინი სხვადასხვა პიროვნებები არიან.

ამიტომ, Taco Bell-მა დემოგრაფიაზე კი არა, ფსიქოგრაფიაზე გაამახვილა ყურადღება: აზროვნებაზე, რომელიც საერთო ღირებულებებს განასახიერებს, რომელსაც რაღაც აქვს სათქმელი და, შესაბამისად, მასთან საუბარი შეიძლება. კომპანიამ ამ მომხმარებელს "კულტურული მეამბოხე" უწოდა. ამ არქეტიპს ენერგია ჰქონდა: ის თაობის მრავალფეროვნებაზე საუბრობდა და იმაზეც, რასაც კომპანია თავის პროგრესულ ფასეულობებად მიიჩნევდა − სურვილი, მხოლოდ რაღაცის წინააღმდეგ კი არ აჯანყებულიყო, არამედ თავისი მძვინვარე პროტესტი გამოეხატა იმის მხარდასაჭერად, რისიც სწამდა. "ამ ერთმა აქტმა გვიბიძგა მთელი წლის განმავლობაში წარმოუდგენელი სამუშაო შეგვესრულებინა", − ამბობს ტრესვანტი.

ამან გაამარტივა Super Bowl-ის რეკლამისთვის დოჯა ქეტის, თაობა Z-ის კერპის, შერჩევა და კინგის თქმით, მეტი ძალა მისცა სარეკლამო რგოლს. "უამრავ რეკლამას რომ გადახედავთ, არ ვიცი, თუ მიხვდებით, ვის ესაუბრებიან ისინი. მხოლოდ ის ჩანს, რომ ჭკვიანებს ესაუბრებიან", − ამბობს ის. მაგრამ, მათ მიაჩნდათ, რომ Taco Bell-მა ზუსტად იცოდა, რომელი მაყურებლის დანახვა სურდა.

ამ იდეამ განსაკუთრებით ძლიერი გახადა მექსიკური პიცის დაბრუნების შემდგომი კამპანია. ამან მისცა იმპულსი მოვლენებს, როგორიცაა, ისტორიაში პირველი ტური Taco Bell Drag Brunch − ხუთ ქალაქში, 10 შოუ, რომელიც ივნისის Pride დღესასწაულზე იყო გათვლილი − კოსტიუმირებული შოუ და ბევრი საჭმელი, რასაც The New York Times-მა "სავარაუდოდ, შოუსა და სადილების ყველაზე მასობრივი შეხამება" უწოდა.

Taco Bell-მა თავის მომხმარებელს "კულტურული მეამბოხე" უწოდა და შესაბამისად, საზოგადოება დაასახელა. მხოლოდ ეს კი არა, მან ჯგუფი ჩამოაყალიბა.

შენი ხალხი ძალიან კარგია

ბევრი ბრენდი ცდილობს ძალიან კარგი იყოს. მაგრამ ისინი ცდებიან: ჰგონიათ, გარეგნულად უნდა გამოაჩინონ ის, რომ ძალიან კარგები არიან. მაგრამ მთავარი არ არის, იმ ადამიანებს მოაწონოთ თავი, რომლებსაც ძალიან კარგებად მიიჩნევთ.

მთავარია, საკუთარ თავში ღრმად ჩაიხედოთ. მთავარია, იმ ადამიანების შესახებ იცოდეთ მეტი, რომლებიც გყავთ, და იმაზეც, რას გრძნობენ ისინი, ასევე იმის შესახებ, თუ როგორ აიძულოთ ისინი უფრო კარგებად იგრძნონ თავი.

ეს Taco Bell-ის ბოლოდროინდელი გასხივოსნება იყო, წლების განმავლობაში სასურველი მომხმარებლის დევნის შემდეგ. კომპანიამ გადაწყვიტა, რომ "[Taco Bell] გუნდის წევრი ერთ-ერთი ყველაზე დიდი კი არა, ყველაზე დიდი დაინტერესებული მხარეა", − ამბობს კელი მაკკალიკი, კომპანიის მთავარი ოფიცერი პერსონალის სფეროში. ბოლოსდაბოლოს, ფრანჩაიზის სახე ხომ რესტორნის პერსონალია.

მაშ, როგორ უნდა აჩვენოთ თქვენს თანამშრომლებს, რომ ისინი თქვენთვის უპირველესები არიან? ამის დასადგენად Taco Bell-მა მრავალი გზა გამოიკვლია. რა თქმა უნდა, ხელფასების გაზრდა, საათების ანაზღაურება არჩევნების დღეს ხმის მისაცემად წასვლისას. და ახალი აპლიკაცია, რომელიც საშუალებას აძლევს კორპორაციას უშუალოდ გუნდის წევრებს გაუზიაროს ინფორმაცია. ასევე, შიდა ინკუბატორი, რომელიც Taco Bell-ის თანამშრომლების მცირე ჯგუფს ამზადებს, ასწავლის მათ, თუ როგორ უნდა გადაჭრან ბიზნესამოცანები. გასულ წელს, ისინი ერთმანეთს ეჯიბრებოდნენ, თუ როგორ მიეღოთ პასუხი შეკითხვაზე: როგორ გავხადოთ Taco Bell საუკეთესო სამუშაო ადგილად სწრაფი მომსახურების რესტორნებში? გამარჯვებული იდეა დღემდე გასაიდუმლოებულია და მას წელს განახორციელებენ.

ამასთან ერთად, ფრანჩაიზთან საუბრები ტარდება იმის ასახსნელად, თუ რატომ არის მნიშვნელოვანი, პერსონალს თავიანთი ღირებულებების გამოხატვის საშუალება მივცეთ. "ეს სწორი ნაბიჯია და უფრო მეტ ფულს მოგიტანთ", − ამბობს მაკკალიკი, ნაწილობრივ იმიტომ, რომ თანამშრომლებს კომპანიაში დარჩენის სურვილი გაუჩნდებათ (პერსონალის გადინება კი, მოუგვარებელი პრობლემაა ნებისმიერი ფრანჩაიზისთვის).

მაგრამ ერთი მარტივი ფაქტიც არსებობს: თუ თქვენს საზოგადოებას რაიმე განსაკუთრებულს შესთავაზებთ, რაც სხვას არავის აქვს, მისი წევრები თქვენთანაც უფრო ახლოს იგრძნობენ თავს და ერთმანეთთანაც. ასეთი იყო ქუჩის ტანსაცმლის ხმაურიან ბრენდ Born X Raised-თან თანამშრომლობის იდეა, მხოლოდ Taco Bell-ის თანამშრომლებისთვის ექსკლუზიური მაისურების ხაზის შექმნა. საბოლოოდ, მათ დაახლოებით 250 000 ინდივიდუალურად შეფუთული პერანგი შექმნეს, თითოეული მარკ კინგის მინაწერით, რომელიც ბრენდის 60-წლიან მემკვიდრეობას ეძღვნებოდა.

სხვებისთვის ახალი უნიფორმა შესაძლოა პატარა ჟესტი იყოს, მაგრამ Taco Bell-ის აღმასრულებლებს მიაჩნიათ, რომ ამან მნიშვნელოვანი ცვლილებები გამოიწვია: კომპანიამ შექმნა რაღაც, რის გაზიარებაც მხოლოდ ერთმანეთისთვის კი არა, მომხმარებლისთვისაც შეეძლო. "ნებისმიერი [ვინც მაისური მიიღო] თავს განსაკუთრებულად გრძნობდა, რადგან ის სპეციალურად მისთვის იყო შექმნილი", − ამბობს ტრესვანტი.

ძალიან კარგი რამ ერთდროულად უნივერსალურიცაა და უნიკალურიც

Taco Bell გლობალური ფრანჩაიზია და მუშაობს ბაზრებზე, სადაც განსხვავებული შეხედულებები აქვთ იმის შესახებ, თუ რა არის ძალიან კარგი. ერთი ქვეყნის "კულტურული მეამბოხე" შეიძლება მეორისას არ ჰგავდეს. და ეს კიდევ უფრო რთული ჩანდა, რადგან მოსალოდნელი იყო, რომ 2022 წლისთვის Taco Bell-ის საერთაშორისო ობიექტების ზრდა აშშ-ის შიდა ზრდას გადააჭარბებდა. საინტერესოა, როგორ უნდა გააერთიანოთ ყველა ეს ადამიანი? "ჩვენ იმისთვის ვართ, ვაკეთოთ ის, რასაც სხვა არავინ აკეთებს", − ამბობს ჯული მასინო, Taco Bell International-ის პრეზიდენტი.

"არ აქვს მნიშვნელობა მსოფლიოს რომელ ქვეყანაში არიან ისინი, − ამბობს მასინო, − "თაობა Z-ს კარგი რეაქცია აქვს ორიგინალობაზე" (მასინო ინდოეთის უზარმაზარ ახალგაზრდა მოსახლეობაზე და გაერთიანებული სამეფოს პანკ-როკის მემკვიდრეობაზე მიუთითებს, მათაც 2022 წლიდან ესპანეთის მსგავსად, 100 ობიექტი აქვთ). და აქ, Taco Bell-ს დიდი უპირატესობა აქვს: ბურგერების გადავსებული ბიზნესისგან განსხვავებით, ტაკოს ბაზარი გაცილებით ნაკლებია, რაც იმას ნიშნავს, რომ ფრანჩაიზის მფლობელებს დიდი შესაძლებლობები აქვთ მასზე ჰქონდეთ პრეტენზია.

ეს ერთ-ერთი მიზეზია, რის გამოც Taco Bell ტაკოზე ამახვილებს მთელ ყურადღებას, იმის მიუხედავად, თუ სად ხსნიან მაღაზიას მისი ფრანჩაიზები.

"ჩვენ ნამდვილად გვაქვს მიზნად დასახული, ტაკო მთელ მსოფლიოში ცნობილი გავხადოთ", − ამბობს მასინო, − "სხვადასხვა ბაზარზე კესადილა ბურიტოსზე მეტად უყვართ. მაგრამ ჩვენი არსი ჩვენი არსია და სწორედ ამისთვის მოდიან ადამიანები ამ ბრენდში".

ძალიან კარგი − შენებას ნიშნავს ტრადიციის მიღმა.

"კომპანიაში ძალიან კარგი ცვლილებები ხდება, მაგრამ ის იგივე რჩება. ის მოძრაობაშია, მაგრამ მყარად დგას ფეხზე, წინ არის, მაგრამ არც ისე წინ. ან, ყოველ შემთხვევაში, როდესაც გადახურდება, იცის, როგორ უნდა გადაიტვირთოს, რათა გაცივდეს. და Taco Bell-ის ძალიან კარგის საფუძველი მისი საყრდენებია: მისი ტაკო, კესადილა, ბურიტო და ხრაშუნა კრეპები. "ეს შეადგენს დღიური გაყიდვების 90%-ს", − ამბობს კინგი.

და გაყიდვების დარჩენილი (ჰიპოთეზური) 10% რა არის? − რა არის და, თავისუფლება. "თქვენ შეგიძლიათ პრაქტიკულად ყველაფერი გაუშვათ, რაც გსურთ, და თუ ის წარმატებული არ იქნება, ეს ნამდვილად არ დააზარალებს თქვენს ბიზნესს", − განმარტავს კინგი, − "და თუ შემთხვევით რაღაც უზომოდ წარმატებული აღმოჩნდება, მაშინ თქვენ უკვე შეგიძლიათ..."

კეთილი, თქვენ გაქვთ მექსიკური პიცა.

როდესაც Taco Bell-მა გასული წლის მაისში მექსიკური პიცა დააბრუნა, იმდენად კარგი შედეგები მიიღო, რომ ბოლოს კომპანია იძულებული გახდა მთლიანად დაებრუნებინა ის. მას დრო დასჭირდა მიწოდების ჯაჭვის პრობლემების მოსაგვარებლად, მაგრამ Taco Bell-მა პირობა დადო: როდესაც ის ისევ დაბრუნდებოდა, სამუდამოდ დარჩებოდა მენიუში. და ბრენდმა ის 2022 წლის სექტემბერში წარადგინა.

პიცის მეორე აღორძინებას ისეთი დიდი წარმატება არ მოჰყოლია, როგორც პირველს, მაგრამ თავდაპირველ ფასზე მეტად იყიდებოდა. და Taco Bell ამჯერად მზად იყო. "ჩვენ ბევრად უკეთესი პროგნოზი გვქონდა, უფრო მომზადებულები ვიყავით", − ამბობს კინგი, − "ეს ახლა ჩვენი ბიზნესის ძალიან, ძალიან სოლიდური ნაწილია".

ძალიან კარგი სხვებს უსმენს.

"მექსიკური პიცას მოძრაობა" გაკვეთილი იყო და ეს დაკავშირებული გახლდათ იდეასთან, რომელსაც კინგი მას შემდეგ ემხრობოდა, რაც 2019 წლის ზაფხულში Taco Bell-ში მივიდა: იდეები ნებისმიერი ადგილიდან უნდა მოდიოდეს.

როგორც კინგი ამბობს, ამ ფილოსოფიის მისაღებად მრავალი მიზეზი არსებობს. დავიწყოთ იმით, რომ როდესაც თანამშრომელი უფრო ახლოს არის ყოველდღიურ საქმიანობასთან, როგორც წესი, უფრო იდეალისტურადაა განწყობილი და ბევრად გაბედული იდეები აქვს. ეს კი იმ ხელმძღვანელებისთვისაა კარგი, რომლებიც შეიძლება მეტისმეტად კონსერვატიულები გახდნენ, თუ წარმოიდგენენ, რამდენად ბევრი გზა არსებობს ახალი კონცეფციის ჩასაფლავებლად. იდეალისტები უმეტესად დიდი სერიოზულობითა და მოწიწებით არ უყურებენ იმ ადამიანებსა და მოვლენებს, რომელთა მიმართ უმრავლესობა პატივისცემითაა განმსჭვალული. კინგს ასეთები მოსწონს. მას არ სურს, რომ Taco Bell-ში უაზრო წესები იყოს დამკვიდრებული − არ აქვს მნიშვნელობა, ეს დიდი კორპორაციის მიერაა თავსმოხვეული, თუ ზოგადად კულტურის მიერ.

კინგს მიაჩნია, რომ ამის ნაცვლად, ხელმძღვანელების მოვალეობაა, გაარკვიონ, თუ როგორ შეიძლება გაბედული იდეების რეალიზება, ამ 10%-იანი სივრცის ფარგლებში თამაში და "ხელის მოკიდება თითქმის ყველაფრისთვის, რასაც მოისურვებთ". ამასთან ერთად, რა თქმა უნდა, ეს ველური იდეები ნებისმიერ ნერვიულ ფრანჩაიზს უნდა დაუსაბუთონ. ისიც აუცილებლად უნდა გაითვალისწინონ, რამდენად შეაშფოთებთ მათ.

ეს ყველაფერი თავმდაბლობას მოითხოვს, რადგან ასეთ შემთხვევაში სიმშვიდის შენარჩუნება ადვილი ნამდვილად არ არის.

"შეუძლებელია ყოველთვის გათვალო, სწორია თუ არა მიმართულება, საითაც უნდა წახვიდე", − ამბობს მაკკალოკი, − "უნდა აღიაროთ, რომ ყველა შეკითხვაზე არ გაქვთ პასუხი". ის განმარტავს: "პროცესის დასაწყისშივე უნდა ვიყო დარწმუნებული, რომ შეკითხვები, რომლებსაც ვსვამ, არავის იდეებს არ აკნინებს. დაე, დაიწყოს პროცესი და ვნახოთ, რა მოხდება".

მაგრამ მოძრაობამ "მექსიკური პიცა" აჩვენა, თუ რა ძალა აქვს მომხმარებლების მოსმენის უნარს ისე, როგორც Taco Bell-ს აქამდე არასდროს შეეძლო. იმის ზუსტად ცოდნას კი არა, ვისთვის უნდა მოესმინა, არამედ ამ ხმაურში მისი სურვილების დაჯერებას.

იმ დღიდან, Taco Bell-მა თავისი კულტურული მეამბოხეების უფრო პირდაპირი გამოკითხვა დაიწყო იმის დასადგენად, თუ რას ისურვებდნენ ისინი მომავალში. Taco Bell-მა სექტემბრის ბოლოს-ოქტომბრის დასაწყისში ჩაატარა კენჭისყრა და ჰკითხა მათ, რომელი ორი ყოფილი პუნქტი უნდა დაებრუნებინა მენიუში კომპანიას: ორფენიანი ტაკო თუ ენჩირიტო (ენჩილადა-ბურიტოს ჰიბრიდი). 10 დღეში კომპანიამ 760 000-ზე მეტი ხმა მიიღო. ენჩირიტომ გაიმარჯვა, რომელიც მენიუში აღარ იყო იმ დროიდან, რაც თაობა Z-ის მრავალი წარმომადგენელი სკოლაში სწავლობდა.

Taco Bell-ს კიდევ ერთი მეტყველი და სრულიად ნათელი სიურპრიზი ელოდა. "ყველა ფიქრობდა, რომ ეს ორფენიანი ტაკო იქნებოდა", − ამბობს ტრესვანტი. ყველაზე კარგმა კომპანიაც კი არ იცის ყოველთვის, რა არის ყველაზე კარგი.

- ნეიტ ჰოპერი Entrepreneur-ის მუდმივი კონტრიბუტორი.

2 Popeyes

ფრანჩაიზინგის დაწყება − 1976; სულ ობიექტები − 3,851; გახსნის ღირებულება − $383.5K-$3.5M

Popees Louisiana Kitchen-ს გასულ წელს შეუსრულდა 50 წელი, მაგრამ ეს გაცილებით მეტი იყო, ვიდრე უბრალოდ მნიშვნელოვანი ეტაპი. ეს იყო ასევე შესაძლებლობა, უფრო გაეძლიერებინა თავისი გზავნილი და ძალა მოეკრიბა. მაგალითად, 2021 წელს Popees-მა 200-ზე მეტი რესტორანი გახსნა აშშ-სა და კანადაში და 2022 წელს კვლავ მოხსნა რეკორდები. Popees Louisiana Kitchen ხშირად უკეთებს რეკლამას თავის ლუიზიანურ ფესვებს, მაგრამ ის ეროვნული ბრენდია და აშშ-ის მთელი ტერიტორიის მრავალ ბაზარზე აგრძელებს ზრდას, ზედიზედ მესამე წელიწადია 500 ფრანჩაიზის სიაშია და მესამე წელიწადია საუკეთესო ათეულშია, 2021 წლიდან კი ყოველწლიურად ერთი ადგილით ზემოთ მიიწევს.

საინტერესოა, როგორ მოახერხა მან 50-ე წლისთავზე თავისი შესაძლებლობების მაქსიმალურად გამოყენება? Popeyes-მა საკუთარ ფრანჩაიზებს ნიუ ორლეანში გამართულ კონვენციაზე უმასპინძლა, სადაც ერთად განიხილეს მომავალი ზრდის სტრატეგიული გეგმები. ეს მენიუს გაფართოებასაც გულისხმობდა, მასში ბუფალოს რანჩოს ქათმის სენდვიჩისა (2019 წელს მისი პირველი შემწვარი ქათმის სენდვიჩის წარმატების შემდეგ), და ასევე ქათმის შავი სენდვიჩის შეტანას და მისი საყვარელი კამბალას სენდვიჩის დაბრუნებას კაჟუნით. "მენიუს ინოვაციებმა Popeyes ნამდვილად გადაიყვანა შემდეგ დონეზე", − ამბობს ჟურდან დალეო, საველე ოპერაციების უფროსი ვიცეპრეზიდენტი.

Popeyes-მა იუბილე გამოიყენა, რათა აქციები და სიურპრიზები შეეთავაზებინა მომხმარებლისთვის. ივნისში მან მომხმარებელს საფირმო ქათმის ორი ნაჭერი 59 ცენტად შესთავაზა, რომელიც 1972 წელსაც, კომპანიის დაარსების დროსაც, იმავე ფასად იყიდებოდა. მან ასევე დროებით დააბრუნა ბრინჯის გარნირი − კაჟუნი და გადაიღო ვიდეორგოლი, რომელშიც წყვილები სიყვარულის 50 წელს განიხილავენ.

მზარდი ინფლაციის გამო, საიუბილეო წელი რესტორნებისთვის რთულ პერიოდში დადგა, მაგრამ პანიკის ნაცვლად, Popeyes-მა არსებული ვითარება გამოიყენა, როგორც შესაძლებლობა, თავისი უნიკალური არომატები გაიმეორა და მენიუში ახალი შეთავაზებები შეიტანა. მომხმარებლები ალბათ ყველაზე კარგად Popeyes-ს მისი კერძებით იცნობენ, რომელშიც ძვლიანი ხორცია, მაგრამ სენდვიჩის გამოშვება დაეხმარა კომპანიას უძვლო ხორციც შეეტანა მენიუში. რესტორნების რთული ლანდშაფტის გამოყენებით, Popeyes-მა შეძლო ეჩვენებინა, თუ რა გამოარჩევდა მას სხვებისგან. თავის მხრივ, ეს მის მომხმარებლებს Popeyes-ის ახლებურად დანახვაში დაეხმარა. "მე ვხედავდი, როგორ ეცნობოდნენ ჩვენი სტუმრები Popeyes-ს სხვადასხვა პროდუქტის საშუალებით", − ამბობს დალეო.

მართალია, საიუბილეო წელი უკვე დასრულდა, მაგრამ Popeyes ამბობს, რომ რესტორანი საზეიმო რეჟიმში რჩება, თავის კაჟუნურსა და კრეოლურ სტუმართმოყვარეობას უწევს რეკლამას და პროდუქტის მარინადში ჩადების 12-საათიან ტექნოლოგიას. "ჩვენ ვხედავთ, რამდენი ადამიანისთვისაა ნამდვილი დღესასწაული ჩვენი კერძები", − ამბობს დალეო, − "და ეს გულთან ახლოს მიგვაქვს".

- ბრიტა ლოქტინგი.

3 Jersey Mike's

ფრანჩაიზინგის დაწყება − 1987; სულ ობიექტები − 2,253; გახსნის ღირებულება − $194K-$954.6K

პიტერ კანკრო, Jersey Mike's Subs-ის დამფუძნებელი და აღმასრულებელი დირექტორი, ფიქრობდა, რომ მისი კომპანია ფრანჩაიზის 230 ახალი ობიექტის გახსნას შეძლებდა 2021 წელს. მაგრამ საბოლოოდ ყველაზე მეტი − 252 მაღაზია გახსნეს საკუთარი მთელი ისტორიის განმავლობაში. ახლა Jersey Mike's-ი 350 მაღაზიის გახსნას გეგმავს 2023 წელს და უმრავლესობას არსებული ფრანჩაიზის მფლობელები ხსნიან. ამ მდგრადი ზრდის გამო ხვდება Jersey Mike's-ი ზედიზედ ხუთი წლის განმავლობაში საუკეთესო ათეულში და სტაბილურად მიიწევს წინ, 500 ფრანჩაიზის სიაში − 2019 წელს მე-9 ადგილით დაწყებული და წელს მე-3 ადგილით დამთავრებული, ხოლო სულ 18 წელიწადი.

Jersey Mike's-ი უკვე კარგ მდგომარეობაში იყო, როდესაც პანდემია დაიწყო. "ჩვენ სპეციალურად ვიყავით მორგებულნი პროდუქტის მიწოდების სერვისს და სხვა ორგანიზაციების მიერ თვითგატანას", − ამბობს კანკრო, − "Jersey Mike's თავიდანვე უმთავრესად პროდუქტის გატანის სერვისი ჰქონდა". ამ ბიზნესმოდელმა ხელი შეუწყო უზარმაზარ ზრდას. COVID-ის დროს გაყიდვები თითქმის 40%-ით, ხოლო მათი საშუალო მოცულობა − $850 000-იდან $1.2 მილიონამდე გაიზარდა.

კომპანია სხვაგვარად მოიქცა გასულ წელს. თავისი ყოველწლიური საქველმოქმედო "გაცემის თვისთვის", როდესაც ყველა კოოპერატივი ფულის მოსაგროვებლად ჩვეულებრივ თვითონ ირჩევს ორგანიზაციას მთელი თვის განმავლობაში, Jersey Mike's-მა ერთ ორგანიზაციაზე − the Special Olympics-ზე გაამახვილა ყურადღება. თვის ბოლოს, "გაცემის დღეს" ყველა ფრანჩაიზმა დადო პირობა, რომ დღის გაყიდვების 100%-ს გამოყოფდა 2022 წლის საქველმოქმედო თამაშების მხარდასაჭერად, რომელიც ორლანდოში, ფლორიდის შტატში გაიმართა. Jersey Mike's-მა პირობა დადო, რომ ეროვნული სპონსორი გახდებოდა და $20 მილიონი გამოყო.

Jersey Mike's-ს მეტროპოლიის რეგიონებში აქვს ფესვები, თუმცა ზოგიერთი ყველაზე წარმატებული მაღაზია ახლახან გაიხსნა სოფლად, მაგალითად, ვერმონტში და არკანზასში. "როდესაც ისტ როჩესტერში, ნიუ იორკში ვხსნით ობიექტს, ადამიანები შინიდან გამოდიან და ამბობენ: "ღმერთო ჩემო, უკვე ოთხი წელიწადია მას ველოდით", − ამბობს კანკრო. ეს ნაწილობრივ კომპანიის საქველმოქმედო საქმიანობასთანაა დაკავშირებული, ეს ახდენს ზემოქმედებას მომხმარებლებზე მთელი ქვეყნის მასშტაბით, და ისიც, რომ კომპანიას ეროვნულ მარკეტინგზე აქვს აქცენტი.

გარდა ამისა, Jersey Mike's-მა დენი დევიტო მიიწვია სარეკლამო რგოლებში მონაწილეობის მისაღებად გასულ წელს. კომპანიამ პირველად გამოიყენა ცნობილი ადამიანები მხარდასაჭერად. დევიტო ესბერი პარკში, ნიუ ჯერსიში გაიზარდა. მისი სახლის შორიახლოს, სანაპიროზე ორიგინალური რესტორანი იყო. თავიდან კანკრომ არ იცოდა, როგორ შეეხედა ამ ფაქტისთვის, მაგრამ შემდეგ გადასაღებ მოედანს ეწვია და დაინახა, როგორი რთული იყო რეკლამაზე მუშაობა, სადაც მთავარი ყურადღება იმაზე იყო გამახვილებული, თუ რა ხდის Jersey Mike's-ს განსაკუთრებულს. "ჩვენ მოგვწონს, რასაც ის ჩვენთან ერთად აკეთებს", − ამბობს კანკრო დევიტოზე, − "ჩვენს გზავნილზე ყურადღების გამახვილება − ახლად დაჭრილი, ახლად შემწვარი პროდუქტი".

- ბრიტა ლოქტინგი

4 The UPS Store

ფრანჩაიზინგის დაწყება − 1980; სულ ობიექტები − 5464; გახსნის ღირებულება − $122.2K-$508.5K

უბრალოდ შეხედეთ გრინვილს, სამხრეთ კაროლინას, იმის დასადგენად, თუ რა განაპირობებს UPS Store-ის ზრდას. სწორედ აქ გახსნა რამი მაიკლმა − მედიცინის დოქტორმა, 2021 წელს ახალი ობიექტი. ეგვიპტელმა ემიგრანტმა მედიცინა მიატოვა, რათა ფრანჩაიზის მფლობელი გამხდარიყო და ეს The UPS Store-ის მიერ რამდენიმე წლის წინ დაწყებული პროგრამით გახდა შესაძლებელი.

კომპანიამ 2020 წლის აგვისტოში, როგორც თვითონ უწოდებს, "საკუთრების ფლობის პროგრამა დაიწყო უმცირესობათა მიერ". მან ფრანჩაიზის საფასურის დაახლოებით 50%-იანი ფასდაკლება შესთავაზა პირველ მყიდველებს, რომლებსაც ამის უფლება ჰქონდათ და უმცირესობის მხრიდან იყვნენ. მას შემდეგ პროგრამა სწრაფად გაიზარდა. პროგრამის ფარგლებში 2021 წელს ახალი ობიექტების 22% გამოჩნდა. გასულ წელს ეს რიცხვი 40%-ს აღემატებოდა.

"ის, რაც თანმიმდევრულ ზრდას უბიძგებდა, სინამდვილეში ჩვენი ფრანჩაიზების ძალასა და ენთუზიაზმთან იყო დაკავშირებული, ასევე მათ ლიდერობასთან თავიანთ თემებში", − ამბობს სარა კაზალან ბიტლი, UPS Store-ის პრეზიდენტი. შედეგად, UPS Store-ის მუდმივი ზრდის გამო, ის მუდამ პირველ ადგილზეა ჩვენს სიაში. ეს ბრენდის ზედიზედ მეშვიდე გამოჩენაა ჩვენს საუკეთესო ათეულში, ზედიზედ 40 წელია, რაც იგი 500 ფრანჩაიზის სიაშია და ზედიზედ 33 წელი, რაც პირველ ადგილზეა თავის კატეგორიაში.

კაზალან ბიტლი ამბობს, რომ მისმა კომპანიამ ეფექტიანი უკუკავშირის სისტემა შექმნა, რადგან ის ფრანჩაიზის ყველაზე მრავალფეროვან სპექტრს იზიდავს, მას უკვე იდეებისა და ხმების უფრო ფართო სპექტრზე მიუწვდება ხელი. მაგალითად, კომპანია აქტიურად სწავლობს ახალ იდეებს მას შემდეგ, რაც ზოგიერთმა ფრანჩაიზმა მაღაზიის დიზაინის შესახებ გამოთქვა აზრი. იგი ახალი დიზაინის იდეებს ამოწმებს თავის ორ კორპორაციულ მაღაზიაში − ატლანტასა და სან დიეგოში, მათ შორის, ახალი ტექნოლოგიების გამოყენებითაც, რაც ამარტივებს და აჩქარებს დაბრუნებისა და პრეტენზიების ავტომატურად წარდგენის პროცესებს.

ხშირად, ბრენდის უდიდესი ინოვაციები პრობლემების გადაჭრის მცდელობებს უკავშირდება. ხელმძღვანელობა კითხულობს: რა არის ჩვენი მომხმარებლებისა და ფრანჩაიზის მტკივნეული წერტილები? "ჩვენ მხოლოდ ციფრულ შესაძლებლობებს კი არ გთავაზობთ ბედნიერი გზისთვის, როდესაც ყველაფერი კარგად მიდის", − ამბობს კაზალან ბიტლი, − "ჩვენ ნამდვილად გვსურს თვითმომსახურების ავტომატური გადაწყვეტილებები შემოგთავაზოთ, როდესაც რაღაც ისე არ მიდის, როგორც წესია".

ინოვაციის ეს სურვილი, ვირტუალური რეალობის სივრცეში, მეტავერსეშიც კი ვრცელდება. ოქტომბერში UPS Store-მა ვირტუალური რეალობის პლატფორმა Decentraland-ზე გახსნა მაღაზია. ინტერაქტიური გამოცდილების მეშვეობით ვიზიტორებს საგანმანათლებლო პროგრამებში შეუძლიათ მონაწილეობის მიღება და ახალი ტექნოლოგიების შესახებ ვიდეორგოლების ნახვა. სტივ ჩემბერსმა − ბრენდის ვიცეპრეზიდენტმა, (საცალო ვაჭრობისა და ბიზნესის განვითარება) მას "ბიზნესსკოლის რესურსი უწოდა ჩვენი მომხმარებლებისთვის".

"ჩვენ იქ ვცდით ყველაფერს და ვსწავლობთ", − ამბობს ის.

- ბრიტა ლოქტინგი

5 Dunkin'

ფრანჩაიზინგის დაწყება − 1955; სულ ობიექტები −12 957; გახსნის ღირებულება − $437.5K-$1.8M

Dunkin'-ის აღმასრულებლები სერიოზულად შეაშფოთა იმან, რომ პანდემიის გამო დილაობით აღარავის მიეჩქარებოდა სამსახურებში, მაგრამ კომპანიამ მდგომარეობის გამოსწორება შეძლო, კლიენტებს ისე ემსახურებოდა, რომ პროდუქტის ასაღებად მანქანიდან გადმოსვლა აღარ უწევდათ. ახლა, თითქმის სამი წლის შემდეგ, Dunkin' რეკორდებს ამყარებს. 2021 წელს შეერთებულ შტატებში Dunkin'-ის გაყიდვებმა $10 მილიარდს გადააჭარბა და 2022 წელს 300 ახალი რესტორნის გახსნის გზაზე იდგა. ეს ყველაფერი ბრენდის ახალ Next Gen-ის იმიჯს იყო მორგებული. განახლებული რესტორნები მობილურით შეკვეთაზეა ორიენტირებული, და ამით გაყიდვების მოცულობამ უკვე $1 მილიარდს მიაღწია.

Dunkin' მე-11 ადგილზე გადავიდა შარშან და ამ ინოვაციებმა ისევ საუკეთესო ათეულის სიაში დააბრუნეს, 20 წლის განმავლობაში უკვე მეთხუთმეტედ. მაგრამ ეს არ არის მისი ყველაზე შთამბეჭდავი მიღწევა − ის ერთ-ერთია მხოლოდ იმ სამი ფრანჩაიზიდან, რომელიც 500 ფრანშიზის ყველა სიაში იყო არსებობის 44 წლის განმავლობაში.

ახლა Dunkin'-ის მთავარი პრიორიტეტი საკვები და სოციალური მედიაა. დონატები Next Gen-ის მაღაზიების წინა მხარეს არის გადატანილი, ყინულიან ყავას კი დახლთან ახლოს ასხამენ, რათა უფრო ეფექტიანი იყოს და ხარისხის კონტროლიც გაუმჯობესდეს.

Dunkin'-მა თავისი ცივი სასმელები გააორმაგა, ზაფხულის ძირითადი პროდუქტი მთელი წლის მენიუში შეიტანა. მან ახალი პუნქტებიც დაუმატა მენიუს: ავოკადოს ტოსტები − დონატის ან გემრიელი სენდვიჩის არცთუ ნატიფი ალტერნატივა საუზმეზე. Dunkin'-ს მომხმარებელთა ახალ ბაზარზე სურდა გასვლა, ვისაც სწრაფად წახემსება უნდოდა ყავასთან ერთად. ყველა ეს ცვლილება მაინც ამარტივებს შეკვეთების მიწოდებას, მათ მანქანიდან გადმოუსვლელად მიწოდებას − ეს არის Dunkin'-ის გამოცდილების ხერხემალი იმ დროს, როდესაც ადამიანებს ჯერ კიდევ არ სურთ თავიანთი მანქანებიდან გადმოსვლა.

"თუ შემდეგი თაობის მომხმარებელზე ფიქრობთ, ისინი ცხელზე მეტად ყინულიან სასმელებს სვამენ და ცოტა უფრო ახალგაზრდები არიან, ცოტა უფრო ქალურები, და ცოტა უფრო მრავალფეროვანნი", − ამბობს სკოტ მერფი, Dunkin's-ის ბრენდის პრეზიდენტი. მისი თქმით, ეს მომხმარებლები ყინულიან სასმელებს ეძებენ, როგორიცაა კაშკაშა ფერების Dunkin' Refreshers და მზად არიან Instagram-ში გამოაქვეყნონ.

ამ სამომხმარებლო ბაზას TikTok-ის ინფლუენსერსა და Dunkin'-ის ფანატზე, ჩარლი დ'ამელიოზე უკეთ ალბათ არავინ წარმოადგენს. კომპანიამ სასმელს მისი სახელი დაარქვა და მასთან ერთად გაუკეთა ორგანიზება Dunkin'-ის გუნდის ღონისძიებას. დ'ამელიო Dunkin'-ისთვის უზარმაზარი აქტივი იყო, თავისი 148 მილიონი გამომწერით TikTok-ზე და 49 მილიონით Instagram-ზე. "ჩვენ ერთ-ერთი ყველაზე პოპულარული რესტორნის ბრენდი ვართ TikTok-ზე და ეს ნაწილობრივ ჩარლის დამსახურებაა", − ამბობს მერფი.

ახლა კომპანია, რომელიც ძირითადად აღმოსავლეთ სანაპიროზე იყო დაფუძნებული, დასავლეთის მიმართულებით ფიქრობს გაფართოებას. Dunkin' უკვე შეიარაღებულია, მის განკარგულებაშია სარეკლამო ფონდი − მშობელი კომპანია Inspire Brands-ის $1 მილიარდზე მეტი და მერფი ამბობს, რომ მალე მთელ ქვეყანას დაიკავებს.

− ბრიტა ლოქტინგი.

6 Kumon

ფრანჩაიზინგის დაწყება − 1958; სულ ობიექტები − 26 527; გახსნის ღირებულება − $67.4K-$145.6K

Kumon'-ზე რეგისტრირებულთა რიცხვი პანდემიის შუა პერიოდში შემცირდა, მაგრამ მალევე აღდგა. 2022 წელს ჩრდილოეთ ამერიკაში Kumon'-ზე 400 000 ადამიანი იყო რეგისტრირებული, პირველად სამი წლის განმავლობაში, ხოლო ოქტომბერში, რეგისტრირებულთა ყველაზე მაღალი მაჩვენებელი დაფიქსირდა 40 წლის განმავლობაში. ზედიზედ მესამე წელია ამ აღორძინების გამო Kumon' საუკეთესო ათეულშია. კომპანია ზედიზედ 26 წელიწადია იკავებს ადგილს 500 ფრანჩაიზის სიაში და 22 წელიწადია პირველ ადგილზეა რეპეტიტორობის კატეგორიაში.

Kumon-მა 2022 წელს გადაწყვიტა რაღაც სხვა ეცადა, მარკეტინგული სააგენტო დაიქირავა, რომელიც სწორედ ფრანჩაიზებზეა სპეციალიზებული. ეს საბოლოოდ ეფექტიანი აღმოჩნდა კომპანიისთვის, რადგან ის რებრენდინგზე მუშაობდა და კონკურენტებს შორის გამოირჩეოდა. ფრანჩაიზის ხელშეკრულებების რაოდენობა ძალიან კარგი იყო. რეკლამები სხვადასხვა წარმომავლობის ადამიანებზე გახლდათ გათვლილი და ვებგვერდი იმ მიზნით განახლდა, რომ ვიზიტორები საჭირო ადამიანს დაკავშირებოდნენ (ფრანჩაიზის განყოფილებაში მშობლები რეკავდნენ და შვილების ჩაწერას ცდილობდნენ, ახლაც ასეა). "უბრალოდ, ყველაფერი სხვაგვარად ჩანს", − ამბობს ჯონ კოლინზი, Kumon-ის ჩრდილოეთ ამერიკის ცენტრის ქსელის განვითარების დეპარტამენტის ვიცეპრეზიდენტი. სააგენტომ საბიუჯეტო თანხა გაანაწილა და LinkedIn-ზე გააკეთა რეკლამა.

ერთ-ერთ დემოგრაფიულ ჯგუფს მასწავლებლები შეადგენენ. Kumon თავისი რეკლამებით სპეციალურად მათზეა ორიენტირებული. რეკორდული რაოდენობის მასწავლებლები მთელი ქვეყნის მასშტაბით ტოვებენ სამუშაოს, და ამიტომ Kumon ეძებს მათ, რათა ჩვენ შემოგვიერთდნენ და ფრანჩაიზები გახდნენ. აქ სრულად ანაზღაურებადი სასწავლო პროგრამაა, გარდა ამისა, Kumon განიხილავს, უკეთ როგორ უნდა წაახალისოს მასწავლებლები 2023 წელს.

Kumon-ის ფრანჩაიზის მფლობელები სხვადასხვა განათლების მქონე ადამიანები არიან − ინჟინრებით დაწყებული და იურისტებით დამთავრებული, მაგრამ კომპანიის მიმართ ყველაზე დიდ ინტერესს მასწავლებლები იჩენენ. "ამ ადამიანებს მოსწონთ განათლებაზე ზრუნვა, უყვართ ბავშვები და საკუთარი წვლილის შეტანა მოსწონთ", − ამბობს კოლინზი, − "ისინი იმედგაცრუებულნი არიან განათლების სისტემის მდგომარეობით".

საგანმანათლებლო სისტემის ამჟამინდელი მდგომარეობა პანდემიას უკავშირდება. ტესტების ქულების დაწევა, ბევრ სხვასთან ერთად, Kumon-ისთვის ხელსაყრელი აღმოჩნდა, რაც მოსწავლეთა რაოდენობის გაზრდაში და კომპანიის პანდემიამდელ მდგომარეობამდე დაბრუნებაში დაეხმარა. 2022 წელს კომპანია 162 ახალი ცენტრის გახსნის გზაზე იდგა და ჩრდილოეთ ამერიკაში აგრძელებს გაფართოებას, მას შემდეგ, რაც 2020 წელს ექვსი ცენტრი გახსნა პანამაში. სიაში შემდეგი ქვეყნები გვატემალა და კოსტა რიკა არიან.

"დიდი მოთხოვნილება და სურვილი გვაქვს სხვადასხვა საზოგადოების წარმომადგენელ ბავშვებს დავეხმაროთ. ჩვენ ვიცით, რომ ამ ბავშვების უმეტესობას ახლა პრობლემები აქვთ", − ამბობს კოლინზი, − Kumon კი, აგრძელებს და აგრძელებს ზრდას.

− ბლერ ბრიოდი.

7Ace Hardware

ფრანჩაიზინგის დაწყება − 1976; სულ ობიექტები − 5674; გახსნის ღირებულება − $292K-$2.1M

ჯონ ვენჰეიზენი 2022 წლის დასაწყისში გახდა Ace Hardware-ის პრეზიდენტი და აღმასრულებელი დირექტორი. მისი ბრენდი მნიშვნელოვნად გაიზარდა პანდემიის დროს, რადგან ყველა სახლებში იყო და ამიტომ თავიანთი სახლებისა და გარემოს განახლებაზე განსაკუთრებულად ზრუნავდნენ. მაგრამ როდესაც საბოლოოდ ოფისში დაბრუნდნენ და დიდი ხნის ნანატრი არდადეგები თუ დასასვენებელი აქტივობები დაიწყეს, ის მიხვდა, რომ შეკითხვა ჩნდებოდა, დასრულდებოდა თუ არა ეს ყველაფერი. ამ დროს, სრულიად საპირისპირო მოხდა: Ace-ს 2022 წლის მესამე კვარტალში ორნიშნა ზრდა ჰქონდა და დაახლოებით 170 ახალი მაღაზია გახსნა.

"პანდემიის მეორე მხარეს გავაღწიეთ და ზუსტად არ ვიცი, ახალი ნორმა როგორი იქნება", − ამბობს ვენჰეიზენი, − "მაგრამ თუ ადამიანები კვირაში ერთი დღით მეტს იმუშავებენ შინიდან, ვიდრე 2019 წელს იყო, ეს ნიშნავს, რომ ისინი 20%-ით მეტად ჩარეცხავენ ტუალეტს, მეტჯერ შეხედავენ კედელს და იფიქრებენ, რომ ის საშინელია". ეს ტენდენცია დაეხმარა Ace-ს ჩვენს საუკეთესო ათეულში მეოთხედ მოხვედრილიყო, და კიდევ, ბინების ტრანზაქციების სწრაფი ზრდა 2021 წელს.

მაგრამ როდესაც ვენჰეიზენი უყურებს, თუ რამ განაპირობა მისი კომპანიის ზრდა, გარემოებებზე გაცილებით მეტს ხედავს. ის მზადყოფნას ხედავს: კომპანია დიდი ხანია მომხმარებლისთვის მოსახერხებელი და ხარისხიანი მომსახურების შეთავაზებას ცდილობდა, რამაც მისცა საშუალება გაყიდვების მკვეთრ ნახტომებს გამკლავებოდა. Ace-ს 4829 ობიექტი აქვს აშშ-ში − მეტი მაღაზია, მეტი ვიდრე The Home Depot-ისა და Lowe's-ს, ერთად აღებულს. ეს კი იმას ნიშნავს, რომ ის აშშ-ის სახლებისა და კომპანიების 75%-იდან 15 წუთის სავალზეა. კომპანიამ ონლაინ შეკვეთისა და მიტანის სერვისებშიც განახორციელა ინვესტირება, რათა მომხმარებელს მისი პროდუქტების მიღება მაღაზიებში მისვლის გარეშე შესძლებოდა.

ონლაინ შეკვეთებისა და მიწოდების შედეგად, 2020 და 2021 წლებში სამნიშნა ზრდა იყო 2019 წელთან შედარებით და ამ მზარდი მოთხოვნის დასაკმაყოფილებლად Ace-მა თავისი ტექნოლოგია და ოპერაციები განაახლა. პროდუქციის მომხმარებლებისთვის მისაწოდებლად Ace საკუთარ თანამშრომლებსა და ავტოპარკს იყენებს, სხვა სერვისის გამოყენების ნაცვლად. ვენჰეიზენი ამბობს, რომ მართალია ამან რეალურად გაზარდა კომპანიის ხარჯები, მაგრამ კომპენსაციას იღებს, და ეს მომხმარებლისთვის უმაღლესი ხარისხისა და ეფექტიანი მომსახურების მიწოდებაა.

ვენჰეიზენს აქვს შეშფოთების მიზეზი 2023 წელს: ინფლაცია და საპროცენტო განაკვეთები შესაძლოა ჰორიზონტზე რეცესიას მიანიშნებდეს. სხვა კომპანიები ალბათ უკან იხევენ, მაგრამ Ace სტაბილურად ზრდის ციფრული მარკეტინგის ბიუჯეტს, ზრდის მარაგებს და მომსახურების მაღალი დონის შესანარჩუნებლად უფრო მეტ თანამშრომელს ქირაობს. კომპანია ამითაა ცნობილი. "ჩვენ არ ვფიქრობთ, რომ სილიკონ ველზე ვინმე შექმნის აპლიკაციას, რომელიც შინ ცხოვრებას არააქტუალურს გახდის, ამიტომ ჩვენი ბიზნესის საფუძველი, როგორც წესი, რეცესიის მიმართ მდგრადია", − ამბობს ვენჰეიზენი, − "ჩვენ რაც შეიძლება სწრაფად ვასრულებთ საკუთარ ყველა სტრატეგიულ იმპერატივს".

- ბლერ ბრიოდი

8 Culver's

ფრანჩაიზინგის დაწყება − 1988; სულ ობიექტები − 871; გახსნის ღირებულება − $2.3M-$5.8M

Culver's-ს, ერთი მხრივ, მოკრძალებული წელი ჰქონდა: ვისკონსინში დაფუძნებულმა საბურგერემ მხოლოდ 55 ობიექტი გახსნა 2022 წელს და იგი ყველაზე პატარა ბრენდია ობიექტების რაოდენობით საუკეთესო ათეულში. მაგრამ Culver-მა სხვა მაჩვენებლით გამოიჩინა თავი: მის ობიექტებს არც ფუნქციონირება შეუწყვეტიათ და არც დახურულან 2019-იდან 2022 წლამდე. ეს განსაკუთრებით შთამბეჭდავია, თუ გავითვალისწინებთ რთულ პრობლემებს, რომლებსაც სწრაფი კვების რესტორნები შეეჯახნენ იმ წლებში − პანდემია, მუშახელის დეფიციტი, მიწოდების ჯაჭვის პრობლემები, ინფლაცია.

შედარებისთვის, 2021 წელს ჩვენს სიაში სწრაფი კვების კატეგორიის რესტორნების დახურვის საშუალო მაჩვენებელი რვა იყო. "ჩვენ ყოველთვის ერთ ჯერზე თითო წარმატებული რესტორნის გახსნაზე გვქონდა გამახვილებული ყურადღება, არ ვცდილობდით ბევრი ობიექტი გვქონოდა", − ამბობს რიკ სილვა, პრეზიდენტი და აღმასრულებელი დირექტორი, რომელმაც 2021 წელს დაიკავა ეს პოზიცია. ეს სტრატეგია დაეხმარა მას ზედიზედ ხუთი წლის განმავლობაში საუკეთესო ათეულში მოსახვედრად.

წარმატების მისაღწევად, Culver's ტალანტებზე ამახვილებს დიდ ყურადღებას. კომპანია მენტორობის უნიკალურ პროგრამას სთავაზობს ნებისმიერ თანამშრომელს და სტრატეგიულ საგზაო რუკას აწვდის მათ − დამწყები დონის მოლარეებისა და მზარეულების ჩათვლით, რათა ისინი ფრანჩაიზის მფლობელები გახდნენ. ეს პროგრამა 200-ზე მეტმა თანამშრომელმა გაიარა და იგი პარტნიორობას გულისხმობს არსებულ ფრანჩაიზთან ბიზნესის შესასწავლად.

გარდა ამისა, Culver's ყოველი ფრანჩაიზის საჭიროებების მიხედვით ამახვილებს ყურადღებას სისტემებზე და მათ ადაპტაციაზე. მაგალითად, ბრენდმა მიწოდებისა და ონლაინ შეკვეთის სისტემების გაუმჯობესებაში განახორციელა ინვესტირება, ამ სერვისებზე მომხმარებელთა გაზრდილი მოთხოვნის გამო, რაც პანდემიის დროს გაძლიერდა.

Culver's ყველა ობიექტზე ნერგავს გლობალურ სიახლეებს, მაგრამ ამასთან ერთად, ყურადღებით უსმენს თავის მფლობელ-ოპერატორებს და მათ შეხედულებებზე ამყარებს იმედს. მათ ერთად უნდა განსაზღვრონ, როგორი უნდა იყოს ეს ცვლილებები. "ჩვენმა ოპერატორებმა იციან ადგილობრივი საზოგადოებების საჭიროებები, ამიტომ მოვუწოდებთ ის გამოიყენონ, რაც ყველაზე კარგად მუშაობს", − ამბობს სილვა.

Culver's, ისე, როგორც კომპანიების უმეტესობა, 2022 წელს ასევე ბევრს ფიქრობდა მიწოდების ჯაჭვებზე. "ჩვენ ვმუშაობდით, რათა კიდევ უფრო მაღალი დონის თანამშრომლობა, გამჭვირვალობა და ნდობა ჰქონოდათ ჩვენს მომწოდებლებს ჩვენ მიმართ", − ამბობს სილვა. ეს არსებული მომწოდებლების ობიექტების დამატებასთან ერთად, მომწოდებლების ფრთხილად დამატებასაც გულისხმობდა, რომ რაც შეიძლება ნაკლები შეფერხება ყოფილიყო.

2023 წელს Culver's ორიენტირებულია იმაზე, რომ კლიენტები და ფრანჩაიზები კიდევ უფრო კმაყოფილები იყვნენ, კლიენტებმა მგზავრობისას შეძლონ შეკვეთების გაკეთება, პროდუქტის მიღება ავტომობილიდან გადმოუსვლელად, და რომ ონლაინ შეკვეთისას მომსახურების ხარისხი უკეთესი იყოს.

- ბლერ ბრიოდი

9 Hampton by Hılton

ფრანჩაიზინგის დაწყება/ 1984; სულ ობიექტები − 2824; გახსნის ღირებულება − $12.3M-$22.8M

შეიძლება სტუმრებმა ვერ შეამჩნიონ, რა დიდი ცვლილებები მოხდა Hampton by Hilton-ში 2022 წელს, მაგრამ ეს არის მთავარი. "ჩვენ განუწყვეტლივ ვზრუნავთ, ჩვენი მფლობელებიც მოგებულები იყვნენ და ამავე დროს, ჩვენი სტუმრებიც კომფორტულად და ბედნიერად გრძნობდნენ თავს", − ამბობს შრუტი განდი ბაკლი, Hampton by Hilton-ის უფროსი ვიცეპრეზიდენტი და ბრენდის ლიდერი. მაგალითად, კომპანიამ ახალი პროგრამა დანერგა, რომ თეთრეული უფრო სწრაფად შეიცვალოს და გარეცხვის ხარისხი უკეთესი იყოს. სტუმრებსაც იმავე დონის მომსახურება აქვთ, მაგრამ ფრანჩაიზის მფლობელებს შემცირებული ხარჯების შეფასება შეუძლიათ.

ბრენდს ამ სახის დეტალებზე ორიენტირებული განახლებები დაეხმარა ჩვენს საუკეთესო ათეულში მერვე ადგილის დასაკავებლად. მუდმივ გაფართოებასთან ერთად, მათ შორის, 2800-ე ობიექტის გახსნა (იგი ზედიზედ 22-ჯერ გამოჩნდა ჩვენს 500 ფრანჩაიზის სიაში) და ზედიზედ მე-14 წელია "სასტუმროებისა და მოტელების" კატეგორიაში ლიდერობს.

კიდევ რა შეიძლება არ შეამჩნიონ სტუმრებმა? ეს დამოკიდებულია იმაზე, თუ რამდენად ყურადღებიანები არიან. საუზმის მენიუს განახლების შემდეგ, სტუმრებმა შესაძლოა ვერ შეამჩნიონ პროდუქტები, რომლებსაც ბევრი ნარჩენი აქვს და რომელიც გაქრა. ასეთია სმუზები. ეს სრულიად ბუნებრივია, რადგან ვინ შეამჩნევს იმის გაქრობას, რასაც არ მიირთმევს?

მაგრამ ისინი სავარაუდოდ შეამჩნევენ ახალ, სეზონურ კერძებს, როგორიცაა ვაფლი გოგრით. და სააბაზანოში იპოვიან იმას, რასაც განდი ბაკლი მოდერნიზებულ "მასობრივი მოვლის პროგრამას" უწოდებს − თმის მოვლის საშუალებების პატარა, ერთჯერადი ბოთლები დიდი, მრავალჯერადი გამოყენების კონტეინერებით შეიცვალა. ამ ცვლილების წყალობით, ნარჩენების რაოდენობაც მცირდება, ფრანჩაიზის ფულიც იზოგება და Hampton by Hilton-ს პროდუქციის ხარისხის გაუმჯობესების შესაძლებლობაც ეძლევა.

სასტუმროს ინდუსტრია აღდგენის გზაზეა პოსტ-პანდემიურ სამყაროში და Hampton by Hilton-ს ყველა შესაძლებლობა აქვს წარმატების მისაღწევად. კომპანიის კვლევამ აჩვენა, რომ ბრენდის სახელი მომხმარებელთა 80%-ზე მეტისთვისაა ნაცნობი, და ეს თითქმის 40-წლიანი ბიზნესისა და მარკეტინგის შედეგია, რომელიც ახლანდელ პარტნიორობასაც გულისხმობს Fox Sports-თან. მაგრამ ბრენდი ასევე აქტიურად ცდილობდა თავისი მომხმარებლების ახალ საჭიროებებზე მორგებას.

მაგალითად, 2022 წელს კომპანიამ სამწლიანი ციფრული ტრანსფორმაცია დაასრულა და სტუმრებს უკვე შეუძლიათ მისი აპლიკაციის გამოყენება რეგისტრაციისთვის, საკუთარი ნომრის გაღება და ოთახის ზოგიერთი ფუნქციის მართვა. მაგალითად, განათების. მან შინაური ცხოველების განთავსების ახალი პოლიტიკა შეიმუშავა დაახლოებით 23 მილიონი ოჯახისთვის, რომლებსაც შინაური ცხოველი გაუჩნდათ პანდემიის დროს.

სასტუმროების ბაზარი ძალას იკრებს და ამანაც შეუწყო ხელი Hampton's-ის შემდგომ გაფართოებას როგორც აშშ-ში, ისე მის ფარგლებს გარეთ.

Hampton 36 ქვეყანაში მუშაობს, 2022 წელს კი ხელი მოაწერა კონტრაქტს თავის მე-700 უძრავ ქონებაზე ჩინეთში. ახლა კომპანიას 60-ზე მეტი ღია სასტუმრო აქვს და თითქმის ორი ათეული უძრავი ქონება კარიბის ზღვის აუზის ქვეყნებსა და ლათინურ ამერიკაში, ასევე, თავისი პირველი ობიექტები გახსნა უზბეკეთში, ლატვიასა და ირლანდიაში.

- ჯეფ ჩიტამი

10 Wingstop

ფრანჩაიზინგის დაწყება − 1998; სულ ობიექტები − 1873; გახსნის ღირებულება − $315.3K-$948.1K

Wingstop აქტიურად შლის ფრთებს, აგრესიულად აფართოებს მარკეტინგს და გასაღების ბაზარს. შედეგი კი, გაყიდვების ზედიზედ თითქმის 20-წლიანი ზრდაა იმავე მაღაზიაში, ბრენდის 22-ე გამოჩენასთან ერთად 500 ფრანჩაიზის სიაში (წელს მისი მეორე გამოჩენაც აღინიშნება საუკეთესო ათეულში). მაგრამ ეს ბრენდის გრანდიოზული ამბიციების მხოლოდ დასაწყისია. "ჩვენი გრძელვადიანი სტრატეგიაა გლობალური რესტორნების საუკეთესო ბრენდის შექმნა", − ამბობს პრეზიდენტი და აღმასრულებელი დირექტორი მაიკლ სკიპვორტი.

ამის მისაღწევად კომპლექსური აზროვნებაა საჭირო, რათა ის შეინარჩუნო, რასაც სკიპვორტი "მარტივ ოპერაციულ მოდელს" უწოდებს. მისი რესტორნები მხოლოდ გუნდის ოთხი წევრით მუშაობენ, რაც ხარჯებსაც ამცირებს და ფრანჩაიზებს პერსონალთან დაკავშირებული პრობლემების თავიდან აცილებაშიც ეხმარება, რასაც ბევრი კონკურენტი აწყდება. Wingstop ციფრულ ინსტრუმენტებში ახორციელებს ინვესტირებას, რათა ეს გუნდები კიდევ უფრო ეფექტიანი გახადოს: Wingstop-მა 2019 წელს დაიწყო პირველად მიწოდების სერვისები, სწორედ პანდემიის დროს, მას შემდეგ ციფრული გაყიდვები თითქმის გააორმაგა და პარტნიორების რაოდენობაც გაზარდა, რომლებსაც პროდუქტს აწვდის. 2022 წელს კი, Uber Eats დაამატა.

ამასთან ერთად, Wingstop-ის მენიუც ვითარდება. მიუხედავად იმისა, რომ ბრენდის სახელი წიწილაზე მიანიშნებს ძვლების გარეშე, ის უძვლო კერძებით აგრძელებს მენიუს გამდიდრებას, ფრთების შეთავაზებითა ძვლების გარეშე. ასევე, ქათმის სენდვიჩის შემოტანით 2022 წელს. შემდეგ კი, მისმა კერძებმა ძვლის გარეშე დიდი გავლენა მოახდინა მომხმარებელზე, რომლისთვისაც პროდუქტის ღირებულება მნიშვნელოვანია ($16,99 დოლარად 20 ფრთა ძვლის გარეშე, ოთხი არომატი, ორი სოუსი და კარტოფილის დიდი ულუფა). შედეგად, Wingstop მოელის, რომ კერძები ძვლების გარეშე მისი მთლიანი მენიუს 50% იქნება.

2022 წელს ბრენდმა თავისი მარკეტინგული ხარჯებიც მნიშვნელოვნად შეცვალა. მან თავისი 1%-იანი ადგილობრივი სარეკლამო ფონდი ეროვნულ სარეკლამო ფონდად აქცია − დაფინანსების ნაწილი, რომელსაც ფრანჩაიზები ადგილობრივ მარკეტინგულ ძალისხმევაზე ხარჯავენ. ამ ცვლილებამ მისცა საშუალება ბრენდს ხარჯები გაეზარდა, ახლახან გახსნილ Wingstop-ის ბევრ ობიექტთან ერთად. სკიპვორტი თქმით, ბრენდს სავარაუდოდ წელიწადში 50%-ით მეტი უნდა დაეხარჯა ეროვნულ რეკლამაზე წინა წელთან შედარებით 2022 წლის მეოთხე კვარტალში, რაც უკვე დაეხმარა მას პრემიუმპოზიციების მოპოვებაში ფეხბურთის ეროვნულ ლიგაში და სხვაგანაც. ის მოელის, რომ ეს ზრდა 2023 წელსაც გაგრძელდება.

დაბოლოს, მათი ადგილმდებარეობის შესახებ: მართალია, ბრენდის ამჟამინდელი ერთეულების მხოლოდ 11%-ია აშშ-ის ფარგლებს გარეთ, მაგრამ Wingstop საერთაშორისო ზრდის დიდ შესაძლებლობებს ხედავს. ბრენდმა სულ ახლახან გახსნა კანადაში პირველი რესტორანი, კიდევ 100-ზე მეტი აქვს დაგეგმილი და გამოაცხადა, რომ ინდონეზიაშიც გააორმაგებდა რესტორნების რაოდენობას. გარდა ამისა, ცოტა ხნის წინ მოაწერა ხელი შეთანხმებას სამხრეთ კორეასთან. "გვჯერა, რომ აქ 200-იდან 250-მდე რესტორნის გახსნის პოტენციალი არსებობს", − ამბობს სკიპვორტი.

- ჯეფ ჩიტამი