25 რამ, რის ცოდნასაც 25 წლის ასაკში ვისურვებდი P.S.: ყოველთვის შეგიძლია დაიწყო თავიდან...
Opinions expressed by Entrepreneur contributors are their own.
You're reading Entrepreneur Georgia, an international franchise of Entrepreneur Media.
- რომ ყველაფერზე ნერვიულობა არ ღირს. სჯობს, ჩვენს ემოციებს გავუფრთხილდეთ და ყველა სიტუაციაში სიმშვიდე შევინარჩუნოთ.
- რომ ძლიერი და მწველი სურვილის გარეშე არაფერი გამოვა და ჩვენი წარმატებაც იმაზე იქნება დამოკიდებული, რამდენად ძლიერია ჩვენი სურვილი.
- რომ ცხოვრება ხშირად უსამართლოა, მაგრამ ამის გამო არ უნდა დავნებდეთ, ვისწავლოთ მომხდარისგან, არ გავჩერდეთ და განვაგრძოთ წინსვლა.
- რომ გამართლების იმედად არ უნდა ვიყოთ და არავინ იცის, იღბალი როდის გაგვიღიმებს, ამიტომ ყოველთვის მზად უნდა ვიყოთ მასთან შესახვედრად.
- რომ მეტის მისაღებად მეტის გაღება მოგვიწევს და არ არსებობს განსაკუთრებული მიღწევა განსაკუთრებული ძალისხმევის გარეშე.
- რომ სწავლა მუდმივი პროცესია და არ სრულდება არც სკოლის, არც უნივერსიტეტის დამთავრებისას და სიცოცხლის ბოლომდე გრძელდება.
- რომ მადლობის გადახდა და ბოდიშის მოხდა საუკეთესო თვისებაა, რაც ადამიანს ამშვენებს და თუ ეს თვისება არ გვაქვს, აუცილებლად უნდა გამოვიმუშაოთ.
- რომ ჯანმრთელობის გაფრთხილება და ცხოვრების ჯანსაღი წესის არჩევა ახალგაზრდა ასაკიდანვე საჭიროა.
- რომ საქმის ჩქარა კეთება ყოველთვის სწრაფად კეთებას არ ნიშნავს და ხანდახან ნელი, მაგრამ თანმიმდევრული ტემპით, უფრო მალე მივალთ მიზანთან.
- რომ დრო ყველაზე დიდი აქტივია და მისი სწორად და ეფექტიანად გამოყენება მთავარ პრიორიტეტად უნდა ვაქციოთ.
- რომ სწავლა ყველასგან შეიძლება და არ არსებობს ადამიანი, ვინც ჩვენზე მინიმუმ ერთით მეტი ღირებული რამ არ იცის.
- რომ შეცდომა და მარცხი წარმატების განუყოფელი ნაწილია და მთავარი ის კი არ არის, რომ ვმარცხდებით და გვეშლება, არამედ ის, თუ რას ვსწავლობთ მისგან.
- რომ მარტივად არაფერი ხდება და ყველა დიდი წარმატების უკან უდიდესი შრომა და ძალისხმევა დგას.
- რომ დაგეგმვა და მომზადება წარმატების აუცილებელი წინაპირობაა და რაც უკეთ მოვემზადებით, მით უფრო თავდაჯერებული შევხვდებით გამოწვევებს.
- რომ რასაც ვაკეთებთ, სულით და გულით უნდა ვაკეთოთ და სანახევროდ გაკეთებულის შედეგიც სანახევრო იქნება.
- რომ სიჩუმე ხშირად ყველაზე ხმამაღალი პასუხია და მოსმენისას მეტი შანსია, ახალი გავიგოთ, ლაპარაკისას კი იმავეს ვიმეორებთ, რაც აქამდეც ვიცოდით.
- რომ ნებისყოფა ძლიერი ადამიანებისთვის დამახასიათებელი თვისებაა და მისი გამომუშავებისთვის საკუთარ თავზე მუდმივი მუშაობა მოგვიწევს.
- რომ ასაკით უფროსი, გამოცდილი და ჭკვიანი ადამიანების რჩევა შესაძლოა გადამწყვეტიც კი აღმოჩნდეს და მათი სახით საუკეთესო მენტორები გვყავს.
- რომ სჯობს გარშემო ტოქსიკური და ნეგატიური ენერგიის მქონე ადამიანების ნაცვლად, ისეთი ადამიანები შემოვიკრიბოთ, რომლებსაც ჩვენს დანახვაზე თვალები უბრწყინავთ.
- რომ რაც ხდება, უკეთესობისკენ ხდება და რაც არ გამოვიდა, სჯობდა არც გამოსულიყო, სამყარო კი გაცილებით უკეთესს გვიმზადებს.
- რომ მტკიცე და ძლიერ ხასიათს რთულად გადასალახი წინააღმდეგობები აყალიბებს და ამიტომაც სჯობს, რთულ გამოწვევებს შევეჭიდოთ.
- რომ გადაწყვეტილება ცხელ გულზე არ უნდა მივიღოთ და სჯობს დრო გავიდეს, რომელიც უფრო სწორი გადაწყვეტილების მიღებაში დაგვეხმარება.
- რომ ყველას მოსაწონი ყოველთვის ვერ ვიქნებით და ხალხის აზრმა დასახულ მიზანზე ხელი არ უნდა აგვაღებინოს.
- რომ ერთი მთის მწვერვალი მეორეს ძირია და მწვერვალის დაპყრობით ეიფორიაში ჩავარდნას სჯობს ახალი მწვერვალების დასაპყრობად მოვემზადოთ.
- რომ თავმდაბლობა ამბიციურობას არ გამორიცხავს და მთავარი ის კი არ არის, ვინ რას იტყვის ჩვენზე, არამედ ის, თუ სინამდვილეში რას წარმოვადგენთ.
P.S.: რომ ყოველთვის შეგიძლია დაიწყო თავიდან...
გიორგი შარაშიძე
მთავარი რედაქტორი
editor@entrepreneur.ge
