"მეამაყება, რომ გლობალური სტარტაპ ფონდის საქმიანობაში მისი დაარსების დღიდან ჩართულები ვართ" რან გიდორი, ისრაელის ელჩი საქართველოში
You're reading Entrepreneur Georgia, an international franchise of Entrepreneur Media.
გლობალური სტარტაპ ფონდი პირველი საერთაშორისო სტარტაპ ფონდია საქართველოში, რომელიც 2019 წელს, ისრაელის სილიკონ ვადისთან პარტნიორობით სილიკონ ველი თბილისის ტერიტორიაზე დაფუძნდა და მიზნად ისახავს ქვეყანაში არსებული ინოვაციური სტარტაპების მხარდაჭერას გლობალურ ბაზრებზე მდგრადი განვითარების პროცესში.
გლობალური სტარტაპ ფონდის ორგანიზებით, ადგილობრივი და საერთაშორისო ინვესტორების მონაწილეობით, ყოველწლიურად იმართება შეხვედრა ქვეყნის მოწინავე სტარტაპებთან მათი შემდგომი დაფინანსებისა და პარტნიორობის პოტენციალის განსახილველად.
ღონისძიება 2021 წლის მაისში მესამედ, გაზრდილი მასშტაბითჩატარდება. ის გააერთიანებს საერთაშორისო პარტნიორებს, მსხვილ ინვესტორებს და სტარტაპ ეკოსისტემის გამორჩეულ მონაწილეებს მსოფლიოდან.
რან გიდორი, ისრაელის ელჩი საქართველოში: "ისრაელის საელჩო საქართველოში 1992 წელს გაიხსნა და მას შემდეგ კერძო და სახელმწიფო სექტორთან თანამშრომლობით საქართველოში მაღალტექნოლოგიური ეკოსისტემის შექმნის ინიციატორია. აღნიშნული ეკოსისტემის შექმნაში დიდი წვლილი მიუძღვის ბიზნესისა და ტექნოლოგიების უნივერსიტეტსა და გლობალურ სტარტაპ ფონდს. გლობალური სტარტაპ ფონდი ქართული სტარტაპ კომპანიებისთვის ძირითად საყრდენს წარმოადგენს. მეამაყება, რომ გლობალური სტარტაპ ფონდის საქმიანობაში მისი დაარსების დღიდან ჩართულები ვართ. ის უნიკალურ შესაძლებლობებს სთავაზობს ახალგაზრდა ინოვატორებს და მეწარმეებს, მიიღონ ფინანსური მხარდაჭერა და შეიძინონ პროფესიული უნარები, რათა შემდგომში საკუთარი ოცნებების ასრულება შეძლონ."
მენი ბენიში, საქართველოს საპატიო კონსული ისრაელში: "მაღალტექნოლოგიური ინდუსტრია ეკონომიკის ერთ-ერთი ყველაზე მნიშვნელოვანი მიმართულებაა. საქართველოსთვის ამ ინდუსტრიის განვითარება გარდამტეხი შეიძლება იყოს და ქვეყნის განვითარების კურსი რადიკალურად შეცვალოს. ვიცი, როგორი თანამშრომლობა შეიძლება ჩამოყალიბდეს ისრაელის კომპანიებს, ინვესტორებს, სტარტაპებს და საქარველოს სტარტაპ ინდუსტრიას შორის. განსაკუთრებით მინდა გამოვყო განათლების, განვითარების ცენტრის, ინვესტორების, ისრაელის საინვესტიციო ფონდის, საერთაშორისო საინვესტიციო ფონდის მხარდაჭერა და თანამშრომლობა. 5-10 წლიან პერსპექტივაში საქართველოს დიდი პოტენციალი გააჩნია, განსაკუთრებით თუ გავითვალისწინებთ განათლების პოტენციალს, მოტივირებულ ახალგაზრდებს, აკადემიურ გარემოს. მაგალითისთვის შეგვიძლია მოვიყვანოთ ბიზნესისა და ტექნოლოგიების უნივერსიტეტი და სხვა საჯარო უნივერსიტეტები. განსაკუთრებით საგულისხმოა Webiz -თან თანამშრომლობა, რომელიც ერთგვარ სათბურს წარმოადგენს ბევრი ქართული და ებრაული სტარტაპისთვის. ჩემს უკან დგას ასზე მეტი დეველოპერი საქართველოდან, რომლებიც ისრაელის კომპანიებში არიან დასაქმებულნი. მათ ასეთივე წარმატებით შეუძლიათ იმუშაონ საქართველოსთვის, საკუთარი თავისთვის, გაავითარონ საკუთარი იდეები, ოცნებები, შექმნან პროგრამები და საზღვრებს გასცდნენ. ჩვენ ყველაფერს ვაკეთებთ, რომ ქართული კომპანიები საერთაშორისო წარმატებულ კომპანიებად ვაქციოთ."
ეალ ბაროზი, გლობალური სტარტაპ ფონდი, Webiz: საქართველოს გააჩნია პოტენციალი, რომ რეგიონის სილიკონ ველი გახდეს. მე აქ ორი წელია ვიმყოფები და ვთანამშრომლობ 150-ზე მეტ დეველოპერთან, რომლებიც საერთაშორისო პროექტებში არიან ჩართული. ისრაელის ტექნოლოგიების ინდუსტრიის წარმომადგენლების ცოდნისა და ქართველი ახალგაზრდების ნიჭის კომბინაცია და შესანიშნავი კულტურა, რომელიც ასე ჰგავს ებრაულ კულტურას, საშუალებას მოგვცემს ხიდი გავდოთ, ერთბლივად ჩამოვაყალიბოთ ნამდვილად კარგი სტარტაპები და მოვიზიდოთ ინვესტორები. ძალიან მნიშვნელოვანია სახელმწიფოს მხარდაჭერა გადასახადების კუთხით. ვიმედოვნებთ, მხარდაჭერა გაგრძელდება განათლების, ასევე ფონდების მოძიების კუთხითაც. ეს ყველაფერი კი საქართველოს მიმზიდველს გახდის ინვესტორებისთვის არა მხოლოდ ისრაელიდან, არამედ მსოფლიოდან. ვფიქრობ, რომ მომდევნო რამდენიმე წელში საქართველოში ათასობით ადამიანი ჩამოვა ინვესტიციების განხორციელებისთვის და აქ საცხოვრებლად. ეს არის მომავლის ტენდენცია, რაც აუცილებლად მოხდება. ქართულ სტარტაპებს შესაძლებლობა ექნებათ ყველა იმ პროცესის ნაწილი გახდნენ, რომელიც მსოფლიოში ამჟამად მიმდინარეობს. ეს კი ქვეყანაში მიმდინარე პროცესებს დააჩქარებს და საქართველოს განვითარების ახალ ეტაპზე გადაიყვანს. იმედი მაქვს, შევხვდები ბევრ კარგ სტარტაპს და მათში არა მხოლოდ ფინანსურ, არამედ ცოდნის და უნარების ინვესტიციასაც განვახორციელებთ."
გლობალური სტარტაპ ფონდის ღონისძიება წელს მესამედ ტარდება. ფონდის ინვესტორებმა რამდენიმე ინვესტიცია უკვე განახორციელეს. პირველი მსხვილი დაფინანსება 2019 წელს საქართველოს ინოვაციების და ტექნოლოგიების სააგენტოს მხარდაჭერით, 1 300 000 ლარის ოდენობით, სტარტაპ Echolize-ში განახორციელდა. დაფინანსება სტარტაპისთვის უმნიშვნელოვანესი აღმოჩნდა და მიმდინარე წელს უკვე საერთაშორისო ბაზარზე გასვლასაც გეგმავს.
ლადი გაბუნია, Echolize-ის თანამდაფუძნებელი: "საქმიანობის დაწყების საწყის ეტაპზე ტექნიკური გუნდიც არ გვყავდა. ინვესტორები ამაშიც დაგვეხმარნენ. "ვებიზი" აქტიურად იყო ჩართული ჩვენი გუნდის შექმნის პროცესში. მათი დახმარებით გასული წლის ივლისში გამოვუშვით პლატფორმა Echolize, რომელიც საქართველოში მუშაობს. 2021 წლის აპრილის დასაწყისში კი ვუშვებთ აპლიკაციას კრეატორებისა და ინფლუენსერებისთვის, რომლის საშუალებითაც უკრანისა და სხვა ქვეყნების ბაზარზეც შევალთ."
სტარტაპებს მიმდინარე წელს გლობალური სტარტაპ ფონდის ადგილობრივ და საერთაშორისო ინვესტორებთან შესახვედრად რეგისტრაცია მითითებულ ბმულზე შეუძლიათ.
